Son lea aitto almmuhan CD skearru, son neavttaša ja lea maid almmuhan divttaidis. ”Árdna – sámi kulturmagasiinnas” beasat oahpasmuvvat dán nuorra sámi multidáiddariin.
Sámi kulturmagasin-prográmma ”Árdna” sáddejuvvo duorastaga guovvamánu 28. beaivvi dii. 17.25 NRK1:žis.
– Sámi girjjálašvuohta lea luonddu-onaniija
Nuorra sámi girječálli Sigbjørn Skåden lea fuolastuvvan go sámi girjjálašvuođas lea nu olu luondu, ja gohčoda dan luonddu-onaniijan. Son oaivvilda ahte sámi girjjálašvuođas lea beare ollu luondu, ja váillaha eambbo girjáivuođa go dušše luonddu sámi girjjiin. Skánitlaš Sigbjørn Skåden lei ieš evttohuvvon Davviriikaid ráđi girjjálašvuođa bálkkašupmái 2007. Diktagirjjinis Skuovvadeadjiid gonagas lei Sigbjørn Skåden sámiid evttohas bálkkášupmái , ja dán girjjis gal ii vuhtto luondu. Skådena mielas luondu šaddá sihke nášunalromantihkkalaš ja ovttageardán.
– Ii dušše iežan miela dihte
Dáid beivviid lea Reifvákki dáiddár Ingunn Utsi gárveme vel ovtta dáidaga, mii galgá čiŋáhit muhtin almmolaš ásahusa. Utsi lohká alccesas dehálažžan dáiddárin ahte ii dušše iežas miela dihte ráhkat dáidaga. Ártnas beasat oaidnit movt son jurddaša, hápmedettiin dáidagiiddis.
Kultuvra lea sutnje eallin
Simon Issát Marainen almmuhii iežas vuosttaš CD dán jagá Johkamohkkemárkaniin, ovdal lea son almmuhan divttaidis ja máŋgga lávdde nalde neavttašan. Ja dáinna hálida ge nuorra máŋggabealát dáiddár eallit. Árdna prográmmas deaivvadit suinna, gii lea cealkán eret fástadietnasa go hálida birgejumi viežžat sámi kultuvrras. Nuorra sohpparlažžii Simon Issát Marainenii lea sámi kultuvra eallin, man bokte son dovdduidis almmuha.
”Árdna - Sámi kulturmagasiidna” sáddejuvvo NRK1:žis duorastaga guovvamánu 28. beaivvi dii. 17.25. Prográmmajođiheaddji dán vuoru lea Sara Ellen Anne Eira.
