Elbiillaiguin vudje eambo go bensinbiillaiguin

Diibmá vudje 45,4 miljárdda kilomehtera geainnuid alde. SSB logut čájehit ahte dál lea vuosttaš geardi go elbiillaiguin vudje eambo go bensinbiillaiguin.

Muhto vaikko elbiillaiguin vudje eambo go bensinbiillaiguin, de vudjet dieselbiillaiguin eambo go sihke el- ja bensinvuojániiguin oktiibuot, muitalit SSB logut.

2021:s gitta 2022 rádjai njidje dieselbiillaid vuodjin 8,5 proseanttain, ja bensinbiillaid dáfus ges 10,3 proseantta.

Olu vástádusat gulaskuddamii ealgabivddu birra

Finnmárkkuopmodat (Fefo) lea ožžon 356 vástádusa gulaskuddamii ealgabivddu oktavuođas. 340 eaŋkilolbmo ja 26 joavkku ja searvvit leat vástidan.

Buot vástádusat leat gieđahallon, ja gulaskuddama čoahkkáigeassu loktejuvvui Fefo-stivrii guovvamánu 14. beaivvi.

– Gulaskuddančoahkkáigeassu addá čielga signálaid dasa, maid ealgabivdit sávvet. Dan mii váldit viidáseappot ođđa njuolggadusaid ráhkadanbargui, muitala meahccehálddašeaddji Kristin Hornset Fefo neahttasiidduin.

Ana Tijoux boahtá Riddu Riđđui

Nu muitala NTB.

Chilelaš Ana Tijoux lea eamiálbmotráppár gii berošta servodatgažaldagain.

Son lea válljejuvvon máilmmi buoremus spánskkagielat ráppárin Rolling Stone magazines, ja lea maid válljejuvvon deháleamos latinamerihkálaš ráppárin Newsweek magazines.

Dál lea čielggas ahte son boahtá Gáivutnii ja Riddu Riđđui.

Ana Tijoux bajásšattai politihkalaš eksiillas Frankriikkas go lei sisriikkasoahti Chiles. Son muitala ahte hip-hop attii sutnje kultuvrralaš identitehta.

– Hip-hop lea riika midjiide geain ii leat riika, lea son ovdal lohkan.

Son leage ovdal, 2016:s, leamašan Riddu Riđus.

Riddu Riđu festiválahoavde Sajje Solbakk lea movtta:

– Boahtá šaddat mielahis buorit doalut. Ana Tijouxas lea stuorra internationála fanjoavku, ja dasa lea buorre čilgehus. Son čállá garra, politihkalaš teavsttaid maid eamiálbmogat miehtá máilmmi áddejit ja dovdet, muitala Sobakk NTB:i.