Mikkel Gaup lei Cannes filbmariemuin vuovdaleamen Nils Gaupa Guovdageainnu stuimmiid filmma. Seammás son lei maid iežas márkanastimin filbmabuvttadeaddjiide.
Sámi dovddumus neavttár lei sakka beahtahallan go filbma ii beassan Cannes-riemuid váldoprográmmii.
Son navdá, ahte soahpamuš maid filbmabuvttadeaddji Rubicon dagai NRK:in lei mielde láivudeamen kinofilmma. Soahpamuša mielde galgá Nils Gaup ráhkadit njeaji- dahje viđaoasat TV-ráiddu Guovdageainnu stuimmiin.
- Filbma šattai heajubut
- Dat gal lea veahá váivi go filbma ii beassan mielde váldoriemuide. Muhto go leat dahkan nu mo leat dahkan, ahte NRK lea addán mun in dieđe man olu ruđa, ja sihtá visot daid govaid maid ovddas sii leat máksán, de ii boađe doarvái čiekŋalit rollekarakteraide. Váttisvuohta lea, ahte olbmot oidnet filmmas juhkamin ja oidnet dan mii dáhpáhuvvá, muhto filbma ii mana čiekŋaleappot go die, čuoččuha Mikkel Gaup.
- Guovdageainnu stuimmit šaddet maid TV-ráidun. Ja dán TV-ráiddus mun jáhkán leat eambbo govat go dan kinofilmmas, navdá Mikkel Gaup.
Jáhkátgo don, ahte soahpamuš NRK:in lea hehtten ráhkadeamis albma buori filmma?
- Mun dovddan dan historjjá ja mun dieđán mo dat lea. Mun gal ádden visot mii dáhpáhuvvá. Guovdageainnu stuimmiid filbma gal lea buorre mu mielas, nu mo Nillas (Gaup) lea čuohppan ja dahkan dan. Olbmot geat eai dovdda dán historjjá, nu mo dáppe Fránkriikkas, ámerihkálaččat ja eaŋgalasolbmot, sidjiide lea juoidá mii váilu measta, geažida Mikkel Gaup.
Ii ádde cuiggodemiid
Filbmabagadalli Nils Gaup.
Foto: Dan Robert Larsen / NRKFilbmabagadalli Nils Gaup bárdá oaivvis go Árdna muitala sutnje maid váldorollahas Mikkel Gaup lea dadjan.
- Mun in diehttelasat ipmir manne Mikka (Mikkel Gaup) dadjá dienna lágiin, muhto soahpamuš NRK:in ii sáhte dahkat filmma heajubun, dat baicce dahká dan dušše buorebun. Go eambbo ruđa oažžu filbmabuvttadeapmái, de sáhttá maid diehttelasat filmma ráhkadit stuorábun. Danne dát soahpamuš lea leamaš dušše positiivvalaš, čilge Nils Gaup.
Ovdalaš vuosttaščájálmasa Tromssas Mikkel Gaup gohčodii filbmabagadalli Nils Gaup baikaseahkkan dannego filbmabagadalli lei addán sápmelaš neavttáriidda heajut orronsaji ja borramušaid go dáža, ruottelaš ja dánskalaš násttiide. Dán Nils Gaup logai iežas dahkan vai sápmelaš neavttárat buorebut heivejit gillájeaddji rollaide go leat vásihan heajos dili.
Nils Gaup ii áibbas liiko go Mikkel Gaup ohpihii cuiggoda su mediijaid bokte.
- Ii sáhte rávisolbmuid gieldit
- Veaháš unohas dat gal lea, muhto rávisolbmuid ii sáhte gieldit hupmamis mediiajain. Olbmot fertejit beassat lohkat maid háliidit, lohká Nils Gaup.
Norgga filbmainstituhta ossodatdirektora Jan Erik Holst lohá Guovdageainnu stuimmiid filmma binnánaš menddo akademalažžan, iige várra dáiddalaččat nu gelddolaš. Holst lohká, ahte gáibádusat ođđaáigásaš filmmaide leat, ahte dat galggašedje leat eambbo ođasmahtti.
Dasa vástida Nils Gaup dán:
- Mun gal in dieđe vissásit maid galggašin dadjat dasa. Filbma lea nugo lea ja dat doaibmá mu mielas hui bures, nu mo lei jurdda dat galggai doaibmat, muhto mun in dieđe vissásit maid dat (Holst) oppanassiige oaivvilda, vástida Nils Gaup.
Duhtavaš filmmain
Fámolaš ámerihkálaš filbmabláđđi Variety cuiggodii Guovdageainnu stuimmiid filmma garrasit maŋŋá vuosttaščájálmasa Tromssa gávpogis. Bláđđi gohčodii filmma oktageardánin ja ovttadimenšunálan, ja čálii ahte dát ii dáidde heivet ámerihkálaš filbmageahččiide.
Nils Gaup ii almmatge oaivvil, ahte son livččii galgan áibbas earálágán filmma ráhkadit.
- In mun gal oainne mo mu livččen galgan filmma earáláhkái ráhkadit oppanassiige. Dieđusge it sáhte vuordit dušše positiivvalaš árvvoáštallamiid. Njulgestaga lea veadjetmeahtton vuoitit buohkaid. Filbma ferte doaibmat nu mo doaibmá. Ja mu mielas dat doaibmá nu mo galggai doaibmat, oaivvilda filbmabagadalli Nils Gaup.
Eambbo Cannes-filbmariemuin oainnát Árdna TV-prográmmas mii sáddejuvvo geassemánu 12. beaivve 2008 diibmu 17.25. Prográmma lea guvttiin vahkuin maŋiduvvon Giro d`Italia sihkkelastingilvvuid geažil.
Loga maiddái:
