Anni-Kristiina Juuso, gii neavttašii Elle Guovdageainnu stuimmiid filmmas, lei maid Cannes gávpogis. Son ii lean nu duhtavaš go filbma ii lean beassan filbmariemuid váldolávdái.
Masá čearrugođii
- Mun measta čearrugohten. Hehe. Ii muhto, lea hui ahkit go filbma ii beassan váldoprográmmii. Jáhkán olbmuid muhtinláhkái vuordán, ahte livččii beassan dohko. Mun maid suoli vurden dan, ahte dál livččen beassan vázzit duoid rukses boardagiiid alde, vuige Juuso.
- Dasa ii almmatge veaje maidige. Nie dat lea eallin, vástida Anni-Kristiina Juuso ja orro binnánaš jeđđemin iežas dainna.
- Stuorra ávkin munnje
Guovdageainnu stuimmiid filmma váldorollahas navddášii, ahte sutnje neavttárin livččii leamaš stuorra ávki jus filbma livččii beassan Cannes váldoprográmmii.
- Dat gal livččii stuorra ávkin, mun jáhkán. Danne go dá leat máilmmi stuorámus filbmariemut ja deháleammos filbmariemut, čilge son.
- Visot mii filbmamáilmmis dáhpáhuvvá, visot oktavuođat maid olmmoš sáhtášii oažžut, buvttadeaddjiiguin deaivvadit ja soabadallat ja riikkaidgaskasaš vuovdaleapmi, dat visot dáppe dáhpáhuvvá, muittuha Juuso.
Anni-Kristiina Juuso muitala, ahte son Cannes-riemuid oktavuođas earret eará lea deaivvadan suopmelaš filbmabuvttadeaddjiiguin, muhto ahte dáid deavvademiiguin eai leat vel makkárge konkrehtalaš bohtosat.
