Vuosttaš oasis lea sáhka báhtareddjiid birra ja movt lei nuorta-Finnmárkku politiijameastárii Ellen Kathrine Hættai dustet dán dili go ollu báhtareaddjit bohte juste nuorta-Finnmárkku bokte Norgii.
Politiijaođastus, suohkanođastus ja Canada
Mii hupmat maid politiijaođastusa birra dás ja guossin dán oasis leaba Ellen Katrine Hætta, gii dál beassá jođihit olles Finnmárkku politiijaguovllu maŋŋel go nuorta- ja oarje-Finnmárkku politiijaguovllut ovttastuvvoje.
Guovdageainnu leansmánni Klemet Klemetsen oaččui ge Hætta hoavdan ja Klemetsen lea maid studioguossis.
Dán vuosttaš oasis šaddá maid sáhka suohkanođastusa birra ja dás lea guossin sámediggepresideanta Aili Keskitalo ja olgesbellodaga politihkkar Nils Ante Eira.
Dán oasis lea maid sáhka eamiálbmotpolitihka birra ja mii geahčestit ge earenoamážit dan mii Canadas lea dáhpáhuvvan go doppe válljejuvvui ođđa stáhtaministtar. Guossin studios lea sámediggepresideanta Aili Keskitalo ja Gáldu direktevra Laila Susanne Vars.
Erika Sarivaara studioguossin
Nuppi oasis ges šaddá sáhka sápmelašmeroštallamis. Dát ášši bovttii ollu digáštallama ja earenoamážit Suomabeal Sámis, muhto maiddái Norggabealde.
Nubbi oassi das mii dáhpáhuvai ođasmáilmmis 2015. Dát oasi gullo maid radios distaga juovlamánu 29. beaivvi.
Duogážin lei dat go Suoma hálddahusriekti dohkkehii 93 olbmo Sámedikki jienastuslohkui, maŋŋel go ledje álggos hilgojuvvon beassamis dohko Sámedikkis.
Studis mis lea guossin Erika Katjaana Sarivaara, gii lei okta sis gii dál beasai jienastit Suoma Sámedikki válggain. Pekka Sammalahti maid čilge manin dát ášši bovttii nu ollu digáštallama.
Lossa fáddá mii rabai čalmmiid
Mannan jagi barggai NRK Sámi reportar Liv Inger Somby dearvvašvuođaáššiiguin ja okta dain áššiin maid čalmmustahtii, lei iešsorbmen Sámis ja earenoamážit Ruoŧabeal Sámis.
Randi ja Thomas Marainen válljiiga rahpasit muitalit iežaska stuora morraša birra go guokte bártni sorbmiiga iežas. Soai muitaleigga man unnán almmolaš veahkki lea oažžumis dakkár dilis.
Mii ságastallat sutnuin dán nuppi oasis ja maid rabasvuohta dákkár lossa áššis sáhttá buktit, go Ruoŧa ráđđehusa ovddasteaddjit, sihke stáhtaministtar ja dearvvašvuođaministtar mearridedje doarjut sámi dearvvašvuođaprošeavtta, dan maid fágaolbmot ledje guhká gáibidan.
Ođas ii beaggán dušše Sámis ja Davviriikkain, maiddái Ovttastuvvan Nášuvnnaid ođasossodat bivddii dán ođasráiddu jorgaluvvot eŋgelasgillii.
Guolásteapmi ja boazodoallu
Ealáhusain Sámis leat válljen geahčestit guovtto fáttá mat čuhcet boazodollui, namalassii sisabáhkken ja bággonjuovvan.
Dán oasis šaddá sáhka guolásteami ja boazodoalu birra. Dát gullui radios gaskavahkku juovlamánu 23. beaivvi.
Dás leat fárus Gearretnjárgga nuorra boazodoalli Ánte Máhtte Eira ja Norgga boazosápmelaččaid riikkasearvvi nubbinjođiheaddji Per John Anti.
Guostátusas dáhpáhuvai maid ollu dán jagi ja NRK Sámi mielbargi Nils Henrik Måsø bargá ge ollu guolástusáššiiguin ja muitala mii su mielas lei dat stuorámus ášši dán jagi. Son finai earret eará ráhkadeame TV-áššiid Islánddas.
Silje Karine Muotka ovddasvástádus sámediggeráđis lea guolástuspolitihkka ja son lea maid mielde dán oasis.
