Loktii Fovsen-ášši Stuorradikki gažadanboddui
Sosialisttalaš Gurutbellodaga Lars Haltbrekken loktii Fovsen-ášši Stuorradikki gažadanboddui.
– Fargga leat gollan 600 beaivvi das rájes go Alimusriekti nannii, ahte sámiid vuoigatvuođat Fovsenis rihkkojuvvojit. Fovsen-ákšuvnnaid oktavuođas árabuš dán jagi dajai ákšonista Ella Marie Hætta Isaka ságastallamis stáhtaministariin: «Mii eat gierdda šat 500 beaivve vel!». Stáhtaministtar vástidii: «Eai šatta, Ella, eai šatta!»
Leago stáhtaráđđi seammá vissis go stáhtaministtar, ahte olmmošvuoigatvuođarihkkumat leat jávkan ovdalgo 1000 beaivvi leat vássán? jearai Haltbrekken.
Oljo- ja energiijaministtar Terje Aasland (Bb) vástidii:
– Mii háliidat gávdnat bissovaš čovdosa. Mis lea gulahallan boazodoaluin. Mii háliidat ásahit soahpamuša huksejeaddjiid ja boazodoalu gaskkas. Mii leat álggahan guorahallama mii galggašii leat gárvvis jagi 2024 giđa, čilge Aasland.
Ministtar deattuha, ahte ferte dahkkot nuppástusmearrádus, mii buori vuogi mielde ii rihko olmmošvuoigatvuođaid.
– Mii ballat ahte gollet vel ain unnimusat 500 beaivvi ovdalgo olmmošvuoigatvuođarihkkumat nohket. Danne ii leat stáhtaministara lohpádusain ákšunisttaide makkárge árvu, oaivvilda Haltbrekken.
Les på norsk