– Dat lea mannan hui bures, mii leat goit ieža hui duhtavaččat dainna movt lágidemiin lea mannan dáid beassážiid, lohká Guovdageainnu beassášfestivála buvttadeaddji, Ol Johan Gaup.
Lassin stuorát konsearttaide leat sii maid dán jagi lágidan guokte stuorábuš musihkkagilvvu, nammalassi unnitgielaid riikkagaskasaš Liet musihkkagilvu ja Sámi Grand Prix.
- Loga maid:
– Áibbas dievva
Konsearttain ja musihkkagilvvuin Guovdageainnus leat leamaš lagabui 40 eaktodáhtolaš bargi.
Sii leat bearráigeahččan sihkkarvuođa doaluid oktavuođas, ja maiddái váldán vára artisttain mat oasálastet doaluin.
– Sámi Grand Prix lágideapmi lei áibbas dievva ja maiddái Liet-lágidemiin manai buot bures, lohká Gaup.
Vižže lasi stuoluid
Kárášjogas ge leat leamaš konsearttat gos sámi artisttat nugo Sofia Jannok ja Kalle Urheim guoimmuhedje beassášgussiid ja earáid guhkesbearjadaga.
Kárášjoga festivála jođiheaddji Kenneth Eliassen lei duđavaš go konsearta lei bivnnut.
– Vaikko sávvat vel eambbo gussiid de leat duđavačča. Soite boahttán moadde čuohte olbmo, lohká Eliassen
.Lágideaddjit fertejedje viežžat vel eambo bevddiid ja stuoluid.
Nilut ja Eira SGP-vuoitit
Diimmá Sámi Grand Prix vuoiti, Ella Marie Hætta Isaksen, dat ovddastii Sámi dán jagi unnitgielaid riikkagaskasaš Liet musihkkagilvvus, mii lágiduvvui Báktehárjjis skilleduorastaga. Son vuittii gilvvu lávlagiin «Luoddaearru»
Beassášlávvordaga vuittii ges Guovdageaidnulaš Inger Marie Nilut Sámi Grand Prix lávlunoasi, šuoŋain «Min duovdagat».
Mázelaš John André Eira vuittii Sámi Grand Prix juoiganoasi, luđiin «Svein Egil».