Dán vahkkoloahpa leat «Polisen HEAD Summer Cup»-vuodjangilvvut Stockholmmas. Gilvvut čohkkejit badjel 500 vuoddji.
Dáid searvvis leat maid Kárášjoga vuodjansearvvis čieža vuoddji.
Doaivva medálja fidnet
Lone Charlotte Eikjok lea balus ovdal gilvvuid, muhto lohká dan ovdamunnin.
– Don šattat eambbo gealdagasas, ja oaččut eambbo návccaid, dadjá Lone Charlotte.
Dattetge lea su mielas veahá issoras.
– Doppe leat nu ollu gilvaleaddjit ja ollu olbmot, muitala jierásmuvvon Lone Charlotte.
Muhto Lone Charlotte lea gávnnahan man láhkai vuoittu sáhttá fidnet.
– Hárjehallat hui ollu ja ii fal borrat njálgáid, dadjá son.
Vaikko vel leat stuorra gilvvut, de lea vuoddjis sávaldat medálja fidnet.
– Jus ovtta medálja oaččun, de gal lean duđavaš, muitala Lone Charlotte.
Nuorat šaddet buorebut vuodjat
Hárjeheaddji Katri Anneli Mortelmans Somby mielas lea dehálaš oassálastit dákkár gilvvuide.
– Midjiide lea hui dehálaš dan dihte go doppe lea guhkit vuojadanálddis, ja nubbi lea ahte besset eará sajis eará nuoraid vuostá gilvalit, čilge Katri.
Vuodjit leat ožžon prográmma maid leat čuvvon ovdal gilvvohallamiid. Katri ávžžuha nuoraid hárjehallat.
– Mis lea dáppe nuorat geardi vuoddjit geat šaddet čeahpit ja čeahpit, ja jus sii áigot viidáseappot, dalle ferte dieđusge hárjehallat, loahpaha Katri.