– FeFo viggá rivvet kárášjohkalaččaid eananvuoigatvuođaid, dadjá Kárášjoga sátnejođiheaddji Svein Atle Somby.
Vuossárgga doalai Finnmárkkuopmodat (FeFo) stivrračoahkkima, mas mearridii duššindahkat ovddit stivrra mearrádusa, mii lei nannen Kárášjoga álbmoga eaiggátvuođa gieldda eatnamiidda ja čáziide.
Sátnejođiheaddji mielas lea dahku unohas.
– Mu mielas lea issoras vahát go eai doahttal kommišuvnna raportta. Dasa lea geavahuvvon olu áigi ja olu návccat. Das eai oro berošteame, dadjá Kárášjoga sátnejođiheaddji Svein Atle Somby.
– Galgá leat finnmárkulaččaid eana
Finnmárkku kommišuvdna lea 9 jagi guorahallan, geaidda gullet eatnamat ja čázit Kárášjoga gielddas, Sis-Finnmárkkus.
Diibmá bođii raporta, mas kommišuvdna celkkii ahte gieldda ássit dat ovttas oamastit daid eatnamiid.
2005 rájes leat finnmárkulaččat fárrolaga oamastan guovllu FeFo bokte. Nu galgá ain leat, oaivvilda FeFo stivrralahttu Bente Haug.
– Mii eat mieđa háddjet eatnamiid ja mii eat sádde ášši viidáseappot Fylkkadiggái eatge Sámediggái. Dál lea dieđusge vel álbmogis vejolaš ovddidit eananvuoigatvuođa gáibádusa Meahcceduopmostullui, lohká Haug.
Stivra juohkásan
Ovdal juovllaid nannii FeFo stivra kárášjohkalaččaid oamastanvuoigatvuođa, muhto mánnodaga stivra jorggihii áššis.
Stivra lea juohkásan dán áššis. Finnmárkku fylkkadikki nammadan áirasat eai dohkket kárášjohkalaččaid oamastanvuoigatvuođa.
Sámedikki nammadan áirasat fas dohkkehit dan.
Sámedikki nammadan stivrralahttu Line Kalak ii loga dattetge riiddu stivrras dán ášši geažil.
– In dajašii nu gal, muhto seammás oaidnit mii ahte go meannudat áššiid, mat gusket sámiide, de lea dávjá jienastusboađus 3-3. Sámedikki áirasat leat vuostálaga Fylkkadikki áirasiiguin, lohká Kalak.
Juovlamánus ledje maid áirasat vuostálaga 3-3, muhto dalle lei Sámedikki áirras Máret Guhttor jođiheaddjin ja sus ledje guokte jiena jođiheaddji ámmáhis.
Ođđajagimánus molso jođiheaddji ja Fylkadikki Kurt Wikan válljejuvvui stivrrajođiheaddjin, ja su guokte jiena dagahedje dan ahte FeFo-stivra dál lea jorggihan áššis.
- Loga maid:
– Billista FeFo luohtehahttivuođa
Kárášjoga sátnejođiheaddji oaivvilda dát billista FeFo luohtehahttivuođa.
– Fylka ja Sámediggi fertejit čorget ja oažžut stivrra ovttasbargagoahtit. Dál leat sii fággálaga, dat ii daga buori FeFoi, oaivvilda Somby.
Su mielas maid lea vahát go kárášjohkalaččaid eananvuoigatvuođat eai šat galgga digaštallojuvvot politihkalaččat Fylkkadikkis eaige Sámedikkis, muhto fievrriduvvot njuolga duopmostullui
– Dákkár ášši bidjat ná johtilit duopmostuoluid ovdii, dat ii duddjo makkárge buori ovttasbargovuoiŋŋa, oaivvilda Somby.
- Loga maid:
Mot dál Kárášjohka
Dál sáhttá Kárášjoga álbmot ovddidit eananvuoigatvuođa-ášši Meahcceduopmostullui, jus eai dohkket FeFo-stivrra mearrádusa.
Sátnejođiheaddji Svein Atle Somby oaivvilda ahte ášši ferte diggái.
– Dás lea sáhka kárášjohkalaččaid vuoigatvuođain. Gielda lea divvon gáibádusa Finnmárkokommišuvdnii. Dál ferte gielddastivra mearridit galgá go guoddalit dan álbmoga ovddas viidáseappot duopmostullui, lohká Somby.
Dan ferte mearridit ovdal geassemánu 11. beaivvi dán jagi.
– Mis lea ain áigi ráhkkanit dasa, lohká Somby.
Maiddái eaŋkilolbmot sáhttet ovddidit ášši Meahcceduopmostullui, ja dat lea nuvttá, dieđihit FeFo:s.
- Loga maid: