Romssa nuorra Jon Mika Nystad Eskonsipo (17) ráhkadii iežas Youtube-kanála go lei dušše ovcci jahkásaš.
Dál leat oktiibuot 34 miljovnna olbmo geahččan su badjelaš 200 animašuvdnafilmma ja 96 000 olbmo čuvvot Thejumifilm-kanála.
ANIMAŠUVDNA FILBMEN: Jon Mika Nystad Eskonsipo govve 2700 gova go ráhkada 3 minuhtta guhkkosaš filmma. 15 govas šaddá sekundda filbma, mii lea maid dábálaš govvafrekveansa lineára TV:s ja filmmain.
Foto: Johan Ánte Utsi / NRKJon Mikas leat guokte váldomihtu dán jagi.
Olahit 100 000 čuvvojeaddji iežas kanálii, ja nuorra filbmadahkkiid Amandus-bálkkašumi vuoitit goalmmát háve.
– Mun ferten ávvudit jus olahan iežan mihtuid, dadjá son.
– Norgga stuorámus Lego Youtube-kanála
STUORÁMUS LEGO-KANÁLA: Nordic Screens fágadirektevra Ivar Steen-Johnsen rámida Jon Mika, ja dadjá kanála Norgga stuorámus Lego-kanála Youtube:s
Foto: Nordic ScreensNordic Screens fágadirektevra Ivar Steen-Johnsen mielas lea Jon Mika bures lihkostuvvan Youtube:s.
– Mun sáhtán dadjat ahte dát lea Norgga stuorámus Lego- animašuvdnafilbmakanála, dadjá fágadirektevra.
Norggas eai leat galle Youtube-kanála mas leat eanet go Jon Mika 34 miljovnna čájeheami.
– Dat mii lea earenomáš Youtube:ain, lea ahte nuorain lea vejolaš ráhkadit iežaset digitála máilmmi ja olahit hui olu gehččiid, dadjá son.
Thejumifilm lea 77 sajis Norgga stuorámus Youtube-kanálaid searvvis, nu čájehit logut neahttasiiddus.
FÁKSIMIILA: Socialblade-neahttasiiddus
Foto: SlidebladeFágadirektevra čilge dilli lea rievdan čeahpes nuoraide geat háliidit oidnot.
– Ovdalaš áigge fertejedje taleanttat beassat aviisii dahje lávddis oidnot ovdal go fuomášuvvojit. Dán áigge sii ráhkadit dušše Youtube-kanála, dadjá Steen-Johnsen.
Son čilgesta maid ahte Youtube bokte sáhttet nuorat dinet ja háhkat alcceseaset eallinláibbi.
– Jon Mika lea čájehan ahte son lea hutkái ja čeahpes muitaleaddji, ja Youtube sáhttá jođánit šaddat stuora oassin su boahtteáiggis, dadjá son.
Google ja Youtube vuovdet máidnasiid olbmuid Youtube-kanála bokte ja dan vuođul mákset oasáža kanála-oamasteaddjái.
Mađi eanet čuvvojeaddji dađi buoret mávssu ožžot, čilge fágadirektevra.
Sávvá goalmmát Amandus-bálkkašumi
Jon Mika lea ovddit jagi ja diibmá vuoitán Amandus nuorra filbmadahkkiid bálkkašumi.
VUOITÁN AMANDUSA: Jon Mika lea vuoitán Amandus-filbmabálkkašumi 2019 ja 2020. Giđđat áigu fas sáddet filmmaid filbmafestiválii, ja sávvá vuoitit bálkkašumi golbma jagi maŋŋálaga.
Foto: Johan Ánte Utsi / NRKDiibmá vuittii bálkkašumi filmmain «Lego swimming pool 2». Ovddit jagi ges filmmain «Lego skating accident».
Giđđat son searvá fas Amandus filbmafestiválii.
Son áigu sáddet moadde filmma, muhto son namuha earenoamážit ovtta filmma masa sus lea jáhkku «10 Differen ways to NOT catch a bug».
– Mun liikon dán filbmii, go dás lea hui álkes muitalus ja lea álki ipmirdit, dadjá Jon Mika.
Filmmas oaidnit lego ja čuroha. Lego giksašuvvá ja mearrida goddit čuroha, muhto dat ii leat nu álki go lego doaivvui.
Amandus dahje Youtube
Youtube sádde silba Youtube play button diploma, mii lea ruovddis dahkkon, sidjiide geat olahit 100 000 čuvvojeaddji.
Goabbá mihttu mearkkaša dutnje eambbo. Vuoitit Amandus-bálkkašumi vai Youtube play button diploma?
– Mus lea veaháš eanet miella Youtube-diplomii, go Youtube lea leamaš guovddážis mu filbmabarggu oktavuođas álggu rájes, dadjá son.
Tiktok:as čuvvot 200,000 olbmo Jon Mika ja 2,1 miljovnna leat deaddilan liikon-boalu su filmmaide. Facebook ges leat 16 duháha čuvvojeaddji.
