Juovllat lahkonišgohtet olles leavttuin ja eanaš stobuin eai leat go maŋimuš ráhkkaneamit vel báhcán ovdal basiid go mun riŋgen.
Nu lea maid Kajsa Balto ruovttus. Doppe álge vuosttaš adveantasotnabeaivvi jo ráhkkanit.
– Ieš gal lean leamaš ártegis dilálašvuođas maŋimuš guokte jagi. Mun dovddan ahte lean bargan juovllaiguin miehtá jagi. Mun lean smiehttan juovlamusihkka birra geasset ja nie, son muitala.
Muhto dál lea muohttaga rátnu gokčan eatnama maiddái su ruovttus olggobeale Oslo, nu ahte dál lea albma juovladovdu sihke sus ja mánáin.
Juovllat leat mánáide
Dál go Kajsa lea ollesolmmoš, ja eadni, de vávjá ahte juovllat leat rievdan dan rájes go ieš lei mánná.
Dál lea eambbo nu ahte son geahččala heivehit mánáide juovllaid, vai sis leat buorit basit.
– Muhto dan han dahke mu váhnemat munnje maid, nu ahte soaitá ahte juovllat eai leat nu olu rievdan, son čaibmá.
Lea maid go ieš šattai eadnin ahte álggii smiehttat sámi juovllaid birra. Ahte son galggašii čuojahit eambbo sámi juovlašuoŋaid ruovttus. Dalle álge jurdagat jorrat.
– Manne in máhte mun dáid lávlagiid sámegillii? Manne dušše dárogillii ja eŋgelasgillii?, son muitala.
Dál lea mánáin vel jiellat lávlla maid fertejit gullat juohke jagi.
– Juovlastállu!, Kajsa moddje.
«Vuordit Juovlaruohta?»
– Jo, dat lea sin mielas hui gelddolaš, son muitala.
Oza du jiellat juovlašuoŋa min Spotify listtus:
Dehálaš sámi juovlašuoŋaiguin
Go ohcagođii sámi juovlamusihkka, de fuomášii Kajsa ahte lea dárbu eanet sámegiel juovlalávlagiidda.
Sutnje lea dehálaš ahte almmuhuvvojit olu sámi juovlašuoŋat. Lea dehálaš ahte gávdno juoga juohkehažžii.
– Mun lean smiehttan hui olu nuorat buolvva birra, veahá iežan mánáid dihtii, ja dovddan dán dárbbu, son muitala.
Su mielas lea nu ahte buot dan juovlamusihkas mii otne čuojahuvvo, de galggašii gullot eambbo sámegiella.
– Dat galggašii gullot rádios. Dat galggašii leat oidnosis. Mun in leat goassige leamaš sámi juovlakonsearttas ieš. Dat lea hui ártet, son lohká.
Ii vuollán
Dál lea šaddan nu ahte ieš doallá juovlakonsearttaid.
– Mu mielas gal lea hui somá doallat juovlakonsearttaid. Dat lea nu earálágan go dan maid muđuid dagan, nu ahte dalle ferten duođaid bargat eambbo, čavget iežan ja hárjehallat, Kajsa muitala.
Son duođaid háliida joatkit čuojahit juovlakonsearttaid, go son dovdá ahte dat lea veahá ođas. Ain jo máddin.
Son jáhkká ahte manná veahá áigi ovdal olbmot ohcalit sámi juovlakonseartta. Sii fertejit hárjánit dasa vuos.
– Sii leat hárjánan gullat dáid eará veršuvnnaid ja go vuolggát juovlakonsertii, de háliidat gullat daid šuoŋaid mat sihkkarastet juovladovddu, son muitala.
Dalle lea dávjá árbevirrui čatnon maid háliidit gullat. Sullii seamma láhkai dahkat juohke jagi.
– Mun in dieđe. Gal mii oaidnit. Mun lean álgán dál ja lean smiehttan čuojahit eanet juovlakonsearttaid boahtteáiggis, loahpaha Kajsa.
