– Jietna lei dat stimuliija maid mun ožžon, go in sáhttán oažžut dan visuála stimuliija. Rytmat ráhkadit iešguđetlágan govaid mu oaivái, čilge John André Eira (31)
Eira lea Gabba-joavkku juoigi. Gieskat vuite sii Spellemann-bálkkašumi iežaset vuosttaš skearruin.
– Dát bálkkašupmi várra muitala ahte mii eat goit dárbbaš heaitit musihka ráhkadeamis, mojohallá John André.
– In jáhke mun lean vuos ipmirdan man stuora bálkkášupmi Spellemann lea.
– Jugát go gáfe? jearrala son ja geige gáfegievnni.
31-jahkásaš lea ruovttus Kárášjogas go NRK deaivvada suinna.
Su sávaldat lea álo leamašan beassat bargat ollesáiggi artistan, ja iežas mielas orro sávaldat dál buori muddui ollašuvvame, vaikko ii leat álo leamašan álki.
Rabasvuohta lei dehálaš
John André eadni, Márjá U. Eira, geahčada áviisačállosiid. Leat ollu mediat čállán dan unna bártnáža birra gii riegádii čalmmiid haga.
Mediat leat John André birra čálligoahtan mánnán juo.
Mediat muitaledje bártnáža ja olles bearraša birra.
Son oidnui sihke TV2 ja bláđiin.
Sutnje lea álo leamašan dehálažžan doalahit rabasvuođa dan birra go su mánná riegádii čalmmiid haga. Son doaivu dan leamašan ávkin dasa ahte lea mannan nu bures suinna.
Son muitá erenoamážit ovtta vásáhusa go aitto lei ollen ruoktot njuoratmánáin.
– Boasttas deaivvadin ovttain oahpaheddjiin guhte muitalii ahte son dieđihii iežas kursii dakkaviđe go gulai ahte gillái lei riegádan čalmmehis mánná.
– Dat gal lei oba ...
Márjá bisánasttá ovdal fas joatká.
– Jurddáš, mánná lei aitto riegádan ja oahpaheaddji lei juo jurddašeamen movt buoremusat su vuostáiváldit skuvllas, muittaša Márjá.
Márjái lei gili doarjja mávssolaš.
– In jáhkkán suinna galggai mannat ná bures
Riegádahttima maŋŋel ii Márjá ieš fuomášan ahte su njuoratmánás eai oba leange čalmmit go riegádii.
Easka moadde diimmu maŋŋel riegádahttima bođii doavttir dainna dieđuin ahte mánás eai leat čalmmit iige goassege de sáhte oažžut oainnu.
SIERRA LANJAS: – Doavttir vieččai mu sierra latnjii, doppe easka muitalii ahte mánná lea čalmmiid haga, muitala Márjá U. Eira.
Foto: Elle Gaup-Johansen / NRKEadneolbmos jorragohte jurdagat boahtteáiggi birra.
– Jurddašišgohten ahte movt dál? Eat han mii máhte maidege dan birra ahte movt dainna birget, muittaša Márjá.
– In lean dalle jáhkkit ahte suinna galggai mannat nu bures go lea mannan, dadjá son.
John André lea jođašan ja fárredan eanet go oallugat earát.
– ÁIGGUN BUOREMUSAIGUIN ČUOJAHIT: Go John André oaččui iežas vuosttaš keyboarda de dieđihii ahte son áigu buoremus musihkáriiguin čuojahit. – Vuolggán Dr. Alban lusa, Stockholmii, muitalii «Hjemmet»-bláđđái.
Foto: Elle Gaup-Johansen / NRKVeaháš issoras fárret
Son lea bajásšaddan unna gilážis, Mázes, gos dovddai iežas oadjebassan, muitala son.
– Máze lea hui oadjebas ja ráfálaš bajásšaddanbáiki. Beasaimet ieža olgun stoagadit, gáhččat ja nordat maid, muittaša John André.
MÁZE SKUVLA: John André lea bajásšaddan Mázes. Dá iežas skuvlaoappáiguin ja vieljaiguin «Dieđát go?»-gilvvus. Govas oainnát: Ánne Márjá Hætta (10), Eskil Hermansen Hætta (9), John André Eira (10) ja Nils Mikal Eira (10).
Foto: Govven: Maret Inger GaupVaikko John André dárbbaša veaháš guhkebuš áiggi oahpásnuvvat ođđa báikkiide, de ii leat dat goasse leamašan hehttehussan sutnje.
Maŋŋel vuođđoskuvlla Mázes, fárrii son Áltái, joatkkaskuvlii.
– Lei veaháš issoras fárret dalle, muhto gal dat manai bures go vuos oahpásnuvven olbmuiguin, dadjá son.
Son lea mátkkoštan viidát ja studeren olu skuvllain. Lea orodan sihke Kristiansandas, Guovdageainnus, Hønefossas, Kárášjogas ja dál duollet dálle Oslos maid.
– Mun liikon orrut gávpogis. Vaikko in soaitte álo searvat juohke diŋgii mii doppe geavvá, de liikon lihkká diehtit ahte doppe lea eallin birra jándora, čilge John André.
Erenoamáš attáldagat
Juoigi ja artista Jan Ole Hermansen lei John André oahpaheaddji vuođđoskuvllas. Son muitala iežas oahppi máŋgii hirpmahuhtten su dainna buriin muittuin.
IEŽAS JUOIGANMÁLLE: Jan Ole Hermansen rámida John André erenoamáš čeahpes juoigin. – Sus lea iežas erenoamaš juoiganmálle, oaivvilda Hermansen.
Foto: NRK– Son oahpai luđiid ovtta gullamis, ja earuhii maiddái máŋggaid čuđiid lottiid jienaid, muittaša oahpaheaddji.
Hermansen illuda go oaidná man bures su ovddeš oahppi lihkostuvvá musihkain.
– Son lei mánnán juo issoras dárkil. Álo galggai buot čuojahuvvot rievttes távttas, muittaša Hermansen.
SKEAŊKKAT: John André Eira álo sávai keyboardaid alccas skeaŋkkan.
Foto: PriváhtaJuoiganmálle rievddada
John André Eira ii oro loktanan dainna go vuittii Norgga stuorimus musihkkabálkkašumi.
LUOHTI ADDÁ VUOITTU: John André lei movttet maŋŋel Spellemann-bálkkašumi vuoittu. Dá čuččoda Marius Trøan Hanseniin, gii lea su joavkkus mielde.
Foto: Elle Gaup-Johansen / NRKSu mielas lea dehálaš leat duhtavaš dainna bargguin maid bargá, muhto datte dovdá alddis buoridanmuni.
– Olmmoš rávásnuvvá ja ain fuomáša ođđa vugiid movt juoigat. Lea várra eallima oahppu, ja nu lea álo buoridanmunni, čilge son.
Lávlloda rišus
John André liiko hástalusaide ja áiggošii iežas hástalit lávlumiin maid.
Dán rádjai lea son dušše lávlon rišodettiin, muitala son.
– Mus livččii miella lávlut maid, muhto in leat bidjan áiggi lávlunhárjehallamii vuos.
SGP-VUOITI: Dá ii leat vuosttaš geardi go John André nammaduvvo vuoitin. Sámi Grand Prix:as 2017 vuittii son juoiganoasis. Boahtte háve soaitá lávlunoasi vuoitit?
Foto: Vaino Rensberg / NRKSon liiko afro-amerihkálaš musihkkašládjii, soulii, ja oažžu das inspirašuvnna.
– Doppe leat nu issoras čeahpit lávlut. Sis lea dat lávlun fokusis, čilge John André.
Artistaeallin lea juoigi sávaldat, muhto sus lea gárvves plána jus musihkkamáilmmis ii meinnestuva.
– Lean studeremin IT fága. Miessemánus lea mus dat maŋemus eksámen, de lea mus bachelor, loahpaha John André Eira mojonjálmmiid.
