Son loktestallá olggiidis go vástida mo sus dál lea dilli. Modji ii leat dušše njálmmi birra, muhto olles su ámadadju báitá.
– Na mo don dovddat dan, jearrá NRK.
– Na ráfálaš, son vástida oanehaččat.
Muhtin lea sádden rukses hearvaliđiid Inger Márjá Sokki Hættai. Ja ii dát amas olmmoš guhte dan dagai, leat dat áidna geasa čuozai lohkat Inger Márjjá gillámušaid birra. Olbmot miehtá Norgga leat sihke njálmmálaččat ja čálalaččat sádden váimmolaš sávaldagaid ja dearvuođaid Guovdageainnu-nissonii.
Gieskat dat NRK almmuhii su muitalusa. 50 jagi leat váivves dovddut báidnán su eallima iđit eahket. Nu guhká lea olbmuid gaskka jorran sáhka ahte son lea lihtodan nevrriin, ja ahte son viežžá baháfámu. Su navde biruidguoddin.
- Dá lea olles čálus:
Inger Márjjá stuorámus sávaldat dalle go iežas vuosttas geardde almmolaččat divttii hállat earáid gullut, lei ahte buohkat besse gullat manne ja mo son lea gillán eallinagi.
– Dego ođđa olmmoš
Dál, badjelaš guokte vahku maŋŋá go čálus almmuhuvvui, de orru eallin mealgat vuohkkaseappot. Juoga lea luoitán.
– Lihkan maid iđđes geahppaseappot, ja oaivi orru čielgan. Lei buorre beassat hupmat dáid áššiid birra. Dovddan nu ahte orun duostileabbon, innerst inne. Munnje riŋgii muhtin Oslo-rivgu, ja son jearai maid mun jurddašan sin birra geat leat gilván solžžaid. Vástidin ahte jeg snur ryggen til dem. Jorgalan sealggi daidda, muitala Inger Márjá.
Su váhkarnieida, Ellen Inga Kristine (50), lea mearkkašan rievdama.
– Son lei náđđágoahtán ja veallái soffá alde ja geahčai tv. Muhto dál lea áibbas eará. Issorasat livžu ja čorgestallá. Dat lea nu movtta ja áiggošii viehkalit duohkut deike. Dál gal rievddai dilli. Ieš gohkkeda, čorge ja fuobmá diŋggaid maid galgá dahkat. Heavskálaš njulgestaga. Dat lea dego ođđa olmmoš, muitala Ellen Inga.
Presideanta: – Leat ovdagovvan
NRK bovdii maid sámediggepresideantta Aili Keskitalo mielde galledit Inger Márjjá.
Maiddái sutnje čuozai lohkat 84-jahkásačča birra. Ja go Keskitalo čohkkedii, de njuorrasii.
Geahča video vuollelis.
– Háliidin muitalit ahte dan maid don leat dahkan, das lea mearkkašupmi sámi servvodahkii, dadjá presideanta.
- Loga:
Son lea maid láibon gáhkoža maid addá Inger Márjái.
– Ja mun jáhkán dat lea veahkkin earáide, geat leat šaddan diekkár nođiid guhká guoddit. Ja mun jáhkán maid ahte don leat hui buorre ovdagovvan go čájehat rabasvuođa, ja leat veahkkin midjiide dego botket diekkár tabuáššiid. Mii eat leat nu hárjánan hupmat dakkár losses, čiegus áššiid birra, dadjá Keskitalo.
- Loga:
Sámediggepresideanta jearrala Inger Márjjás ahte gáhtágo son muitalii almmolaččat.
– In. Lean guhká jurddašan ja jurddašan. Lean jurddašan ahte galggašin gávdnat gean nu vai beasan olggos. Mun lean dego lássejuvvon birra buot. Ja dál lea uksa rabas, vástida Inger Márja.
- Loga: