Aila Biret Selfors, gii lohká sámi rievtti, atná ávkkálažžan sámiide go Tromssa Universitehta stivra ii miehtan juridihkkaossodaga heaittihit sierra ossodahkan.
– Mun jáhkán ahte diekkár gievrras juridihkka fakultehta ja fágabiras, ferte jus galgá leat biras maiddái sámi riektedutkamii. Nu ahte dat lea hui illudahtti ja mun jáhkán dat lea buorre olles universitehtii ja sámi birrasii. lohká juridihkka fakultehta doavttergráda studeanta.
Universitehta direktevra dat lei árvalan fakultehtaid logu njeaidit ja juridihkkafakultehta časkit oktii eará fakultehtaiguin.
– Dál lea institušuvdna starggas
Árvalus lei čužžehan vuostálastimiid sámiid gaskkas, muhto dál besset sii illudit.
– Dat lea hirbmat buorre go juridihkalaš fakultehta bisuhuvvo. Dat mearkkaša ahte dál lea dat institušuvdna starggas nu ahte mii beassat ráfis sámi studeanttaid bovdet; boahttet min lusa studeret, ja mii beassat ráfis sámi dutkanrekruhtaide lohkat ahte boahttet min lusa ja duŧkagohtet.
Stivramearrádus bisuhit juridihkkaossodaga lei ovttajienalaš.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.
