– Lij ma máhttet pasientajt bájkálattjat dálkudit jus lidjin vædtsaga, javllá Divtasvuona suohkandåktår Fred Andersen, ja gåhttju stuorra konferánssaj boahtteájge hásstalusáj birra guovllo-Vuonan.
Biehtsemáno ásaduvvá stuorra varresvuodakonferánssa aktisasjådåstusá birra. Nordlánda universitæhtta la dán konferánsa duogen, ja gåhttjum li konferánsav “Varresvuodadievnastusá boahtteájge guovllosuohkanijn”.
Stuoráp åvdåsvásstádus suohkanijda
Suohkana ham oadtjum li ja sjaddi oadtjot stuoráp åvdåsvásstádusáv varresvuodadievnastusáj hárráj ja gatjálvis le gåktu duossti sij dájt hásstalusájt, javllá doajmme suohkandåktår Divtasvuonan Fred Andersen, guhti la akta sijájs gut la plánim dáv konferánsav vaj oadtjot ságastallamav jåhtuj, ja buoredit máhtudagáv aktisasjådåstusá birra.
– Konferánssa tjalmos boahtteájge varresvuodadievnastusájt guovllo-Vuonan. Sihtap suohkanij dahkamusájt boahtteájgen tjalmostit, gåktu varresvuodadievnastusájt organiserit.
Konferánssaj båhti fáhkatjiehppe giehtotjit daj åsij birra ma varresvuodasuorgen sjaddi guosskat sierraláhkáj guovlosuohkanijt ja ma li hásstalusá ja gåktu ásadit varresvuodabirrasav guovlojn ma ælla stuoráp stádaj lahka.
Varresvuodadievnastusá sámijda
Ja duodden la aj ássje avtaárvvusasj varresvuodadievnastusá sámijda ja gåktu buoremusát hiebadahttet Aktisasjådåstusá gájbbádusájda subtsas Fred Andersen, suohkandåktår Divtasvuonan.
– Galggap aj tjalmostit varresvuodafálaldagájt sámijda, ja gåktu dav buoremus láhkáj aktisasjådåstusájn hiebadahttet.
Buoredit mahtudagáv
Suv mielas ælla suohkanijn uddni sihke nuoges máhtudahka jali teknihkalasj vædtsaga sajen gåtsedittjat dav bargov mij boahtte ájge sjaddi suohkanij åvdåsvásstádusán varresvuodasuorgen.
– Moadda buojkulvisá li dagu Divtasvuonan gåktu luluj máhttelis dálkudit pasientajt bájkálattjat jus teknihkalasj vædtsaga lidjin sajen, ja pasienta ællim de dárbahit skihppijviesojda mannat gå dåhku la mælggat ja låssåt pasientajda maneldit.
Ja dan diehti sij ásadi dáv konferánsav vaj tjoahkkit sihke fáhkatjiehpijt ja politihkkárijt ságastalátjit. Sij li aj gåhttjum sihke sámedikkepresidentav ja varresvuodaministarav oassálastátjit.
– Ájnna gut ij la vásstedam sån galggá oassálasstet la varresvuodaministar. Varresvuodaministaris Bent Høies ep la dal ájn oadtjum vásstádusáv, subtsas Fred Andersen.
