Deanu gielddapolitihkkár ja váhnen Nancy Charlotte Porsanger Anti váillaha Sámedikki Sirpmá sámi skuvlla heaittihanáššis. Dan čállá Ávvir.
- Loga dárogillii:
Sámediggi lea vuolláičállán oahpahusovttasbargošiehtadusa Kalallit Nunaat, Manitoba ja Nunavut ráđđehusaiguin. Šiehtadus sisdoallá ahte eamiálbmogat galget ovttasbargat oahpahusain, ja oahppat goabbat guoibmásis.
Ávvir aviisii Nancy Porsanger Anti moaitá Sámedikki go álggaha riikkaidgaskasaš ovttasbargguid eai ge oainne mii Sámis geavvá.
– Manne eai áimmahuša oktasašbarggu mii doáibmá?
Son lea váhnen Sirpmá sámi skuvllas man Deanu gielda lea mearridan heaittihit. Váikkuhus giddemis lea ahte ovttasbargoprošeakta Ovttas, mii Deanu gielddas ja Ohcejoga gielddas lea, heaittihuvvo. Prošeakta lea leamaš doaimmas 20 jagi, ja maŋimuš logi jagi lea skuvllain leamaš oktasaš oahpahus guokte beaivvi vahkus.
– Riikkaidgaskasaš ovttasbargošiehtadus, man Sámediggi lea álggahan, lea ráhkaduvvon seamma áikkaiguin go manne mii áigut bisuhit Sirpmá ja Ohcejoga fálaldaga. Lea ártet go Sámediggi áigu ásahit diekkár ovttasbargguid viiddis máilmmis, muhto seammás diktet gieldda heaittihit dakkár ovddasbarggu mii dáppe doaibmá bures, Porsanger Anti lohká Ávvirii.
Ádde moaitagiid, muhto..
Sámediggeráđđi Silje Karine Muotka lohká iežas áddet go háliida eambbo áŋgiruššama Sámedikkis Sirpmá ja Ohcejoga oktasaš prošeakta oktavuođas.
– Muhto váttisvuohta lea ahte go skuvlaeaiggát, namalassii Deanu gielda, ii hálit bisuhit skuvlla, vástida Muotka Ávvirii.
Muitala iežas čielgasit hástalan Deanu gieldda ášši oktavuođas.
– Sávan ahte Deanu gielda oaidná man dehálaš ovttasbargu lea, lohká Muotka.
- Loga maid dárogillii:
Bivdán veahki njunuš eiseválddiiguin
Ohcejoga ja Sirpmá váhnemat leat oktasaš cealkámušastis bivdán fuomášumi Árktalaš oahpahuskonfereanssas, Norgga ja Suoma stáhtain ja Sámedikkiin.
– Mii leat fuolas das go sámi mánáid giella- ja oahppovuoigatvuohta lea rašes vuođđu nu guhká go lea gielddaid bušeahtaid, skuvlaeiseválddiid ja báikkálaš politihkka duohken, lohket váhnemat oktasaš cealkámušastis.
Go Deanu gielda lea botken ovttasbarggu Ohcejogain, de jávká vejolašvuohta ásahit oktasaš sámeskuvlla nie movt guhká lea plánen.
- Loga dárogillii:
– Olmmošvuoigatvuohta geatnegahttá
Ohcejoga ja Sirpmá váhnemat oaivvildit ahte sámemánáin lea vuoigatvuohta fitnet oahpahusa iežaset gillii ja iežaset kultuvra vuođul.
– Geatnegasvuohta dán ollašuhttimis lea stáhtain sihke vuođđolágaid ja olmmošvuoigatvuođaid mielde. Danin mii gáibidit ahte Norgga ja Suoma stáhtat ovttas Sámedikkiin ollašuhttet oktasaš sámeskuvla ásaheami. ON erenomaš raporterejeaddji Victoria Tauli-Corpuz lea maid ávžžuhan Norgga ja Suoma stáhta doarjut dán ovttasbarggu, muittuhit váhnemat.