Loahpa geahčen ođđajagimánu galget nuorat Kalaallit Nunaatas, Alaskas, Sámis ja Kanadas gilvvohallat Arctic Winter Games gilvvuin.
Dán jagi lea čuoigantaleanta Elle Anne Grethe (12) okta dain.
Guovdageainnu nieida gilvvohallagođii guovtte jagi áigge ja jagi maŋŋel son olahii eavttuid beassat Team Sápmái go čuoiggai gilvvuin Anáris.
– Lean olu hárjehallan čuoiganteknihkka nu ahte galggan nagodit jođánit čuoigat, lohká Elle Anne Grethe.
Valáštallan buktá buriid
Sámi Valáštallan Lihtus (SVL) oidnet ahte Sámi valáštallamis, nu mo valáštallamis muđui, leat máŋggas heaitán koronapandemiija maŋŋel.
SVL nubbijođiheaddji, Leif-Roar Mikkelsena mielas leat sin čohkkehusat Sámis dehálepmosat, go doppe sámi nuorat oahpásmuvvet guđet guimmiiguin.
– Sii geat ovddastit Team Sápmi leat oassálastán buot min eará čohkkehusaide. Dan ahte besset Team Sápmái ja vásihit Arctic Winter Games lea dušše bonus valáštalliide, lohká Mikkelsen.
Measta jáhkkemeahttun
Elle Anne Grethe ipmi, Máret Ristiinná Sara, muitala ahte ferte rávisolmmoš veahkkin jos galgá mokta leat čuoigat ja vejolaš gilvvohallat.
Su mielas lea earenoamáš go nuorra nieida nu bures birge gilvvuin.
– Ii han dat leat nu diehttelas ahte beassá dáid gilvvuide, earenoamážit maid dan dilis mas Elle lea leamaš. Beaivvit eai leat aivve leamaš geahppasat go son han lea eatni massán badjelaš jagi áiggi, muitala Máret Ristiinná.
Elle Anne Grethe čuoigáge measta juohke beaivve.
– Dat lea hui geabbilis mánná lihkadit ja sávvámis dat vuoitá vel doppe. Goit ahte čuoigá bures ja nagoda čađahit gilvvuid doppe, dadjá Máret Ristiinná.