Gávdne 14 bohcco maid jáhkket geatki lea goddán

– Mii leat oahpan oaidnit movt iešguđetge eallit goddet bohccuid, nu ahte dá lea geatki. Dat lea guovtti bohccos oaivvi dolvon maid. Dat lea hui čielga mearka ahte lea geatki, dadjá Cohkolat orohaga nubbijođiheaddji Nils Ole Triumf.

Golbma miilla oarjjabealde Guovdageainnu , Čáhppesvári guovllus leat Triumf ja su siidaguoimmit gávdnan oktiibuot 14 njiŋŋelas ráppi.

– Mu siidaguoibmi gávnnai gaskavahkku golbma bohcco. Guokte šattai goddit go ledje nu bahuid gaikoduvvon, okta gal lei jápmán, dadjá son.

Triumf lohká dáid eará ráppiid soaittáhagas fuomášan. Duorastaga go álge čohkket ealu,de sii oidne riebaniid ja garjjáid guovllus.

– Mii de álggiimet doppe fieskki siste gávdnat ráppiid. Muhtin ráppit ledje jovgon dohko, šattaimet goaivut mehtera ovdal gávnnaimet, dadjá Triumf.

Su mielas ii leat máŋge veara gávdnat bohccuid mat leat nie goddon.

– Muhto ii dasa veaje maidge, meahcceealli dárbbaha maid biepmu, dadjá Triumf.

Šaddet ráppiid geasehit márkanii

Triumf imašta manne Stáhta luonddubearráigeahčču(SNO) ii gáro boahtit báikái iskkat ráppiid.

Dál gevve boazosápmelaččat ieža ráppiid geasehit duoddaris márkanii nu ahte SNO beassá iskat mii lea goddán bohccuid.

– Dáid mun gal in bala, dat gal leat nu sihkkaris mearkkat dain gal, muhto ahte mii galgat buktit daid vulos, gat gal lea beare tullja, dadjá son.

Su mielas lea jallodat jápmán bohccuid doalvut eret duoddaris, go de han šaddá borapire eará bohccuid goddit vai gallána.

– Dus maid válddálii biebmofáhta njuneovddas eret, mun garanteren don vieččat ođđa fáhta mas lea biebmu, nu dahká meahcceealli maid, dadjá Triumf.

– Boastut šaddan

Romssa ja Finnmárkku boraspirelávdegotti John Roald Karlsen mielas maid lea imaš go SNO ii vuolgán báikái iskat ráppiid.

– Go lea ná stuora vahágis sáhka, de gal livčče SNO galgan vuoruhit vuolgit dohko, dadjá Karlsen.

Finnmárkku SNO boraspireovddasvástideaddji, Magne Asheim, muitala Ávvir aviisii ahte dán áššis lea leamaš boasttuáddejupmi, ja SNO láve vuolgit báikái go lea sáhka dákkár stuorra vahágiin.

– Mii galggaimet odne vuolgit dohko, muhto boazoeaiggádat ledje jo dolvon ráppiid gillái, ja mu ipmárdusa mielde eat sáhte dál šat vuolgit go boazoeaiggádat leat gárddástallame, muitala Asheim.