Boazu ja guovssahas.
Dá dat lea su ovdamunni, jáhkká.
Are áigu Japanii bohccobiergguin
– Japanas dadjet «ichiban». Dat mearkkaša «The best of the best». Ja nu leage bohccobiergu.
Finnmark Rein-jođiheaddji čilge ahte asialaččat beroštit guovssahasas ja gaskaijabeaivvážis.
– Dáppe han boazu eallá, dadjá Figved.
Ja danin sáhttá leat maid álki jođihit bohccobierggu Japanii.
Dáinna dat boazu galgá gilvalit.
Dat lea wagyu, Japana burru.
Boanddat bibmet dan nu ahte deahkis lea sullii seamma olu biergu go buoidi.
Ja biergu dákkár burrus lea máilmmi divraseamos.
Kilohaddi lea golmma duháhis gitta viđa duhát kruvdnui.
– Dán haddái sáhttit mii maid vuovdit bohccobierggu, ja vel divraseabbonge, dadjá Are Figved.
Are Figved ii jáhke Norgga márkaniin lea vejolaš fidnet buoret hatti bohccobierggus go dan maid dál dahket.
Danin ferte ođđa márkaniidda, ja Japan lea dakkár vejolašvuohta, jáhkká son.
Unjárgga badjeolmmoš Jan Ivvár Smuk mielas lea buorre jurdda geahččalit ođđa márkaniid.
– Dát boahtá buorrin olles servvodahkii, ii dušše badjeolbmuide. Seammás sáhttá maid geasuhit gussiid deike Sápmái, ja lea ávkin mátkeealáhusaide.
Geir Pollestad lea Norgga ráđđehusa eanadoallo- ja biebmoministtar.
Su mielas lea gelddolaš jurdda olgoriikii vuovdit bohccobierggu.
– Muhto, dadjá son.
– Jurddašan ahte stuorámus hivvodat ain berre leat borramuššan Norgga álbmogii. Sáhttá gal áinnas vuovdit erenoamáš osiid bierggus olgoriikii.
Trond Einar Persen bargá stáhtalaš ásahusa Innovasjon Norge ovddas.
Sin bargun lea earret eará veahkehit Norgga fitnodagaid beassat gálvvuiguin olgoriikii.
– Sin mihttu han lea dahkat boazodoalu nu gánnáhahttin go vejolaš. Ja dalle fertet gávdnat kundara guhte máksá eanemusat bierggu ovddas.
Persen jáhkká vejolažžan fidnet seamma buorre hatti bohccobierggus go Japana wagys.
Rune Rødbotten lea biergodutki, ja bargá Nofima-dutkanásahusa ovddas.
Son gal jáhkká vejolažžan oažžut japanlaččaid máksit albma buori hatti bohccobierggus.
– Japanas, ja measta olles Asias, lea dakkár jáhkku ahte bohcco bokte ožžot alla šattolašvuođa ja buoret potenssa.
Vaikko vel eanadoallo- ja biebmoministtar háliidage vuoruhit Norgga ássiid, de joatká Are Figved barggus ahte olahit Japana márkaniid.
– Jus buot manná bures, de sáhttit 2025:s leat jođus. Ja jus galgat lihkostuvvat, de fertet nagodit vuovdit eanet go dušše čielgedehkiid.
Ansvarlig redaktør: Vibeke Fürst Haugen
Nettsjef: Hildegunn Soldal