Divtasvuona hummár, jali Midnight sun lobster gåktu dat aj ieŋŋilsgielan nammaduvá, le dal dåbdås divtasvuonagijda gå la Divtasvuona suohkana dåbddomærkka. Ja hummár Divtasvuonan la nav gåk diehtep værálda nuorttalamos hummár.
Valla dájt maŋemus jagijt la badjánam gatjálvis jus guollebiebmadimæládus mij la lassánam Divtasvuona meran lulu nievres láhkáj vájkkudit hummárav sjattatjit ja oablotjit vuonan.
Hummárav gehtjadit
Merradutkaminstituhtta, Havforskningsinstituttet galggá dán giese tjadádit hummárguoradallamijt Divtasvuonan, valla guollebiebmadibme ij la dal sivva manen sij galggi hummárav lagábut gehtjadit.
– Galggap gehtjadit gåktu hummár Divtasvuonan sjaddá gå buohtastahteduvvá hummárij ietjá guovlojn duola dagu Vestlándan, subtsas Ann Lisbet Agnalt seniordutke ja biologa Merradutkaminstituhtan.
Ij tjuottjodusájt máhte doarjjot
Valla dav tjuottjodusáv jut guollebiebmadibme le hieredussan hummárijt sjattatjit ja oablotjit ij de dutke máhte doarjjot. Artihkkalin FiskeribladetFiskaren-bláden tjuottjoduvvá jut hummár ja rehka miedema ietjájduvvi dat selgas majt luossabiebmadimæládus adná luossatjivrrusij vuosstáj.
– Ep la gåjt mij Merradutkaminstituhtan oassálasstám dákkir guoradallamijda. Valla soajttá le ájggomus tjadádit dákkir guoradallamijt jus la dárbbo. Valla javllat tjielgga jus dákkir selga lulu vájkkudit nievresláhkáj hummársládjaj, iv mån gal uddni máhte duodastit, javllá Agnalt.
Ij nav jåhtelit sjatta
Dijmmá sij aj guoradallin hummárav ja dalloj sij mierkkijin hummárijt ja navti de galggi dán giese gæhttjalit oadtjot diehtet sjaddamdilev hummárin.
– Vuojnnet Divtasvuonahummár ij sjatta nav jåhtelit gå hummára ietjá guovlojn, javllá dutke.
Divtasvuodna le vuodna moadda vuonaj, ja merradutke lulun sávvat sij lulun aj máhttet buohtastahttet hummárijt vuonas vuodnaj mij guosská sjaddamdilláj.
– Valla dán giese galggap guoradallat hummárijt ma li Áhkávuonan Divtasvuonan, gånnå dijmmá mierkkijma dajt.
Ij la sierra sládja
Divtasvuona hummár gullu Europa-hummársladjáj mij gávnnu Grehkalándas gitta Divtasvuodnaj, subtsas Agnalt. Sån subtsas hummár mij la ietjá guovlojn le ietjálágásj hummár gå dat mij sjaddá Divtasvuonan, dagu hummár vehi oarjjelin Divtasvuona, Nuortta-Fuoldán.
– Lip gávnadam hummár mij la Divtasvuonan ja grehkalándan li ietjálágátja dåjs ietjá Europa-hummárijs. Divtasvuonahummár ij la sierra genehtalasj sládja, valla vehi sierralágásj le dat galla, javllá Agnalt.
Midnight-sun lobster
Ja hummár Divtasvuonan la oadtjum sierra nammadusáv ieŋŋilsgiellaj, namálasj midnight-sun lobster, gaskidjabæjvátja hummár, subtsas Agnalt.
– Dav dat gåhtjoduvvá dan diehti gå hummár dal dábálattjat labut ja bårrå ijájt gå la sjævnnjat ålggon. Valla Divtasvuonan dal giesijt ij la sjævnnjat ijájt ja dan diehti de labut Divtasvuonahummár ietjáláhkáj gå ietjá hummára væráldin.