FeFos soahpamuš bieggafápmofitnodagain
Finnmárkkuopmodat FeFo oamasta ieš bieggafápmofitnodaga. Sis lea sierra soahpamuš Finnmark Kraft fitnodagain, mii addá dán fitnodahkii eksklusiivva vuoigatvuođa cegget turbiinnaid.
FeFo direktevra Jan Olli čilge manne sis lea dákkár šiehtadus.
– Dat lea sihkkarastin dihte dan, ahte jus galget leat bieggamillopárkkat Finnmárkkus, de galget leat báikkálaš oamasteaddjit das ja ahte dienas boahtá finnmárkulaččaide buorrin.
Finnmark Kraft OS oamastit báikkálaš elfápmosearvvit ja FeFo oamasta 12 proseantta oasusiin. Stuorámus eaiggát lea Alta Kraftlag AS.
Lea áiddo FeFo mii mearrida geat dat besset sin eatnamiid ala hukset bieggafápmorusttegiid.
Vaikko vel FeFo lea addán eksklusiiva vuoigatvuođa Finnmark Kraft fitnodahkii hukset bieggafápmu, de dat ii mearkkaš, ahte leat jo ožžon luvvejuvvot eatnama dása, deattuha FeFo direktevra.
– Mii árvvoštallat sin ohcamuša justa seamma láhkai go earáid ohcamušaid. Ja jus mii gávnnahat ahte leat váikkuhusat menddo stuorrá, erenomážit boazodoalu ektui, de mii mannat vuostá, dadjá Olli.
Finnmark Kraft lea maid ásahan ovttasbarggu Oslo fitnodagain Fred Olsen Renewables. Ovttas áiggošedje sii hukset bieggafápmorustegiid Beatnatgáisái ja Oarjjit Nuorevutnii siskkit Čorgašii.
120 turbiinna leat dál vuos plánejuvvon.
– Sii jáhkket, ahte lea vejolaš heivehit dáid boazodoalu eanangeavaheami ektui. Buorre gulahallan sáhttá čoavdit olu, dadjá Finnmark Kraft stivrrajođiheaddji Per Erik Ramstad.
