– Jua mii leat vuovdigoahtán bivdogoarttaid nugo dábálaččat, muhto mii čuovvut dárkilit man oallugat ostet goarttaid ja mii sáhttit dieđusge bissehit goarttavuovdima jus lea dárbu, lohká Fefo meahccehálddašeaddji Christina Bjørkli.
Finnmárkku opmodat(Fefo) vuovdigođii bivdogoarttaid smávvafuođđoelliid bivdui borgemánu vuosttáš beaivve, muhto eai lohkkagoađe rievssahiid ovdal viđat beaivve.
Bjørkli deattuha ahte Fefo gáržžida bivddu bivdogoartavuovdima oktavuođas juo.
– Fefo lea bidjan meari man galle bivdi besset bivdit iešguđet ge bivdoguovllus ja dáinna lágiin gáržžidit bivddu vuovdima oktavuođas juo, dadjá son.
Geahča fáktáčállosis movt dát dáhkko praktihkalaččat.
Beassá bivdit go lea bivdogoarta
Oažžu go bivdi ruđaid ruovttoluotta dahje ožžot go fálaldaga bivdit eará bivdoguovllus jus Fefo ferte gáržžidit rievssatbivddu?
– Mii eat mávsse ruđa ruovttoluotta jus čájehuvvo ahte Finnmárkkus lea beare unnán rievssat.
Finnmárkku opmodaga smávvafuođđobivddu eavttuin boahtá ovdan ahte jus Fefo ferte gáržžidit bivddu, de dát dáhkko maŋemusat čakčamánu vuosttáš beaivve.
Rievssatlohku rievddadallan issorasat
Jagi 2015 ledje Finnmárkkus 18 rievssaha juohke njealjádas kilomehteris, nu čájehit Fefo logut. Diibmá ges ledje 6 rievssaha juohke km². Eará sániiguin unnui rievssatlohku golmmageardánit, seammás háliidedje golmmageardánit eanet bivdit boahtit Finnmárkui rivset.
- Loga maid:
Fefo meahccehálddašeaddji čilge ahte Lulli-Norggas lei diibmá earenoamáš heajos rievssat jáhkki, ja nu čilgejit bivdiid beroštumi.
Rievssatlogu rievddadallama čilge Bjørkli ná.
– Rievssatlohku rievdá jagis jahkái nugo eará elliid lohkku, ja dasa leat iešguđet ge sivat. Rievssatlohku lea ovdal maid rievddadallan olu, dadjá son.
Bjørkli jáhkká dán jagáš bistevaš dálvvis sáhttá leat negatiivvalaš váikkuhus rievssatlohkui.
– Lei unnán bievla go rievssat monnegođii, ja unnán divri seammás go lei galmmas, muhto rievssahis dieđusge lea vejolašvuohta maŋidit monnema. Borgemánu lohkkán čájeha dieđusge man buorre rievssatjáhkki šaddá, dadjá son.
Lasiha vel ahte boraspiret maid gáibidit iežaset oasi.
