Njieljeluhkie-njielje noerh mahte golme våhkoeh ruffien askesne Burträsksne orreme, skyllemesijjesne. Aejlegen gærhkosne lin, jïh dellie maa skyllejin.
Vihkeles noeride
Albertina Kråik Johansson lij akte dejstie noerijste mah veeljin saemien skyllemesæjjan vuelkedh, jïh dïhte tuhtjie gaajh luste orreme jïh aaj veanhta daate vihkeles noeride.
– Daam nuepiem ikth åådtje, Albertina jeahta.
Sijjesne dah noerh sinsitnine åahpenedtieh jïh åadtjoeh aaj sijjien saemien identiteete nænnoestidh. Dah ovmessie aamhtesigujmie barkieh jïh stååkedieh,jïh dah aaj vaaran vuelkieh, lustestellieh. – Mijjieh aaj jeesusen jïh jupmelen bijre soptsteme, dïhte gieltegs, Albertina jeahta.
Hijven åahpenadtedh
Albertina soptseste gellie orre voeplh åådtjeme gosse skyllemesijjesne vearadamme.
Dïhte tuhtjie dan soe luste gosse åadtjoe jeatjah saemien noerigujmie åahpenadtedh
– Daelie leam voelph abpe Saepmeste åådtjeme, dan luste, dïhte jeahta.
Dïhte aaj tuhtjie jeatjah saemien noerh edtjieh saemien skyllemesæjjan vuelkedh. Sov mïelen mietie dan hijven gosse åådtje saemieh gaajhkene lehkeste Sapmeste åahpenidh jïh råakedh.
Jïh dah noerh mah dan jaepien skylleme joe mieredamme gosse edtjieh båetije aejkien råakedh. – Mijjieh edtjebe juelkietjengkere-cupesne, Bïenjedaelesne gaavnedidh, Albertina bïeljele.
Joekehtse
Dæjman skyllemesijiem kritijhke åadtjoeji, jïh aerebi dan jaepien Sáminuorran noeresiebrie Sveerjesne bievni ahte eah sïjhth ektiebarkoem Sveerjen gærhkojne jåerhkedh, dan åvteste eah tuhtjh gærhkoem saemien maahtoem dej saemien øøhpehtæjjaj luvnie geehtestieh.
Dan jaepien sijjiem buerie moenedimmieh åådtjeme!
Jon Krista Jonsson, øøhpehtæjja skyllemesijjesne orreme, dæjman jïh dan jaepien, jïh dïhte jeahta ahte vååjnoe goh gærhkoem moenedimmide dååsteme.
– Vååjnoe guktie gærhkoem sæjhta skyllemesijjiem bueriedehtedh, jïh håhkoem lea ahte gaajh hijven skyllemesijjie båetije biejjieh sjædta, Jonsson jeahta.