Dá lea dat ođđa sámediggeráđđi / Her er det nye sametingsrådet

Hopp til innhold

På norsk: Her er det nye sametingsrådet

NSR, Guovddášbellodat ja Ávjovári Johttisápmelaččaid listu leat soahpan joatkit ovttasbargguin Sámedikkis dán áigodaga maid.

Silje Karine Muotka válljejuvvo ođđa sámediggepresideantan go dat ođđa Sámediggi čoahkkana dán vahkkus. Son váldá badjelasas dán doaimma Aili Keskitalos.

Mielde jođihit Sámedikki boahtte njealje jagi lea Muotka válljen ovtta nissonolbmo ja golbma dievddu.

Dá lea dat ođđa sámediggeráđđi:

Presideanta Silje Karine Muotka (46)
Norgga Sámiid Riikkasearvi
- Silje Karine Muotka orru Álttás, muhto lea Unjárggas eret
- Son lea leamaš Sámedikkis 2009 rájes
- Son lea leamaš NSR jođiheaddji 2006-2008
- Son lea čieža jagi leamaš sámedikkeráđđeláhttu ja maŋemus áigoda lea sus leamaš ovddasvástádus earret eará minerála ja ealáhusášiide
Ráđđeláhttu Runar Myrnes Balto (34)
Norgga Sámiid Riikkasearvi
- Runar Myrnes Balto orru Romssas
- Son lea NSR jođiheaddji ja lea leamaš NSR sámedikke joavkku jođiheaddji maŋemus áigodaga
- Son lea ovdal leamaš politihkkalaš ráđđeaddi Aili Keskitalo ráđis
Ráđđeláhttu Mikkel Eskil Mikkelsen (32)
Norgga Sámiid Riikkasearvi
- Mikkel Eskil Mikkelsen lea Hábmeris eret, muhto orru dál Bådåddjos
- Son lea oahpu váldán girkomusihkkarin
- Son lea leamaš sámediggeráđđelahttu 2017 rájes, ja sus lea leamaš ovddasvástádus giella, bajasšaddan ja oahpahus áššiide
Ráđđeláhttu Maja Kristine Jåma (28)
Norgga Sámiid Riikkasearvi
- Maja Kristine Jåma orru Snåases, muhto lea bajasšaddan Fovsenis
- Son lea baozodoalli ja lulli sámegiel oahpaheaddji
- Jåma lea leamaš politihkkalaš ráđđeaddi sámedikkeráđis njukčamánu 2020 rájes
- Son lea leamaš njunoš lulli sámi jienta bieggafápmohuksemiid vuostá
Ráđđeláhttu Hans Ole Eira (49)
Guovddášbellodat/Senterpartiet
- Hans Ole Eira orru Mázes Guovdageainnu suohkanis
- Son lea boazodoalli ja politihkkár
- Son lea leamaš sámediggeráđđeláhttu 2020 rájes ja sus lea leamaš ovddasvástádus earret eará deavvašvuođa áššiide, duodjái ja kulturmuitoáššiide ráđis

– Boahtte gaskavahkku almmuhat mii mainna ráđđelahtut galget bargat, muitala Muotka.

Mikkel Eskil Mikkelsen ja Hans Ole Eira joatkiba ráđđelahttun ođđa sámediggeráđis. Maja Kristine Jåma ja Runar Myrnes Balto leaba ođđa ráđđelahtut.

Maja Kristine Jåma lea bajásšaddan Fovsenis Snåases, lea boazodoalli, lullisámegiel oahpaheaddji, ja son lea maid leamaš politihkalaš ráđđeaddi sámediggeráđis cuoŋománu 2020 rájes.

– Lean oahppan ollu maŋimuš jagi, ráđđeaddin. Šaddá gelddolaš oaidnit mo ođđa bargu šaddá, dadjá Jåma.

Jåma lea ollu bargan Fovsen-áššiin. Fovsen-ášši ja bieggafápmoovdáneapmi leat ge sivat manin son álggii politihkket.

– Válddán buot mu vásáhusaid mielde dán bargui, sihke boazodoalus ja máttasámi giela ja kultuvrras, mat leatge mu váimmu lagamusa áššit, dadjá son.

Runar Myrnes Balto lea maŋimuš áigodaga leamaš NSRa parlamentáralaš jođiheaddji Sámedikkis.

– Sus lea erenoamáš buorre gelbbolašvuohta. Son lea guhká jođihan máŋga dásis sihke min organisašuvnnas ja olggobealde maid, dadjá Muotka Myrnes Balto birra.

Beaiveálgu-julggaštus

Maiddái álginjulggaštus, Beaiveálgu-julggaštus, ovdanbuktojuvvui preassakonferánssas.

Dan ii fátmmas buot áššiid, muhto čujuha politihkalaš geainnu. Nu lea čállon ovttasbargošiehtadusas.

NSR, Johttisápmelaččaid listtu ja Guovddášbellodaga parlamentáralaš jođiheaddjit ja Silje Karine Muotka ledje čoahkkanan vuolláičállit ođđa ovttasbargošiehtadusa.

Beaiveálgu-julggaštusa vuoigŋa lea vuolgán vuosttaš sámegiel románas «Beaiveálgu», man oahpaheaddji Anders Larsen čálii 1912:s.

– Gillilat son doarui dan ovddas ahte sámemánát galge beassat oahppat sámegillii ja sámegiela, dadjá Muotka.

– Ja barggadettiin politihkain leat midjiide leamašan dehálaš ahte mii dárbbašat eanet oahpaheddjiid ja mánáidgárddeoahpaheddjiid.

Ovttasbargoguoimmit leat maid geahččan sámi ávnnaslaš kulturvuođu, sámi vuoigatvuođaid, eastadit vaššiságaid dáhpáhuvvamis ja sihkkarastit ahte barget rasismma vuostá.

– Ovttaárvosašvuohta lea midjiide dehálaš, dadjá Muotka.

Dá lea oassi Beaiveálgu-julggaštusas:

Beaiveálgu-julggaštus

Sámevašši galgá loktejuvvot sierra áššesuorgin Sámediggeráđis, ja galgá vuoruhit doaimmaid mat eastadit sámevaši ja mat buktet máhtu ja meannudanvuogádagaid.
Mii dáhttut bargat heahteguovddážiid ásahemiin mat leat heivehuvvon sámi álbmogii.
Ovttasbargoguoimmit dáhttut ovddidit sohkabealdásseárvvu sámepolitihkas ja organisašuvdnabargguiguin.
Mii dáhttut ovddidit dásseárvosaš vuoigatvuođaid LHBTIQ-olbmuide ja ahte iešguđet seksuála sojuid ja sohkabealidentitehtat dohkkehuvvojit.
Mii dáhttut hukset sámegielat oktasašvuođa mas juohke okta galgá sáhttit lihkostuvvat iežas giellaovdánemiin.
Unnimus sámi gielat galget nannejuvvot doaibmabijuid ja vuoruhemiid bokte mat dahket vejolažžan ealáskahttit daid.
Mii dáhttut vuoruhit ahte ásahuvvo váidin-, gozihan- ja áittardeaddjeásahus, mii sihkkarastá ahte sámi giellavuoigatvuođat duohtandahkkojuvvojit.
Mii dáhttut áŋgiruššat ahte sámegielat loktejuvvojit eanet oidnosii ja olámuddui digitála báikkiin mat geavahuvvojit árgabeaivvis, earret eará dan bokte ahte ráhkaduvvojit eanet sámi áppat ja spealut.
Mii dáhttut guorahallat nuvttá sámi mánáidgárdefálaldaga, ja vuoruhit sámi mánáidgárddiid boahttevaš bušeahtain.
Sámi oahpponeavvobuvttadeapmi vuoruhuvvo nannosit.
Mii áigut áŋgiruššat eanet sámi oahpahusfálaldagaid ovdii, ovttasráđiid allaskuvllaiguin ja universitehtaiguin. Obbalaš lullisámi bacheloroahppu lea guovddáš mihttomearri.
Ovttasbargoguoimmit dáhttot bargat ahte SAMINOR 3 sámi dearvvašvuođadutkan čađahuvvo.
Mii dáhttut vuoruhit bargat dálkkádathástalusaiguin, earret eará dan bokte ahte hábmet sierra sámi dálkkádatraportta mii guorahallá makkár váikkuhusaid dálkkádatrievdan buktá sámi kultuvrii, ealáhusaide ja servodahkii.
Ovttasbargoguoimmit dáhttot láhččit dili máhccamii giliide vai sihkkarastit ealli sámi báikegottiid.
Mii dáhttut vuoruhit ođasmahtti ealáhusovdáneami ovdal eahpeođasmahtti ealáhusovdáneami.
Ovttasbargoguoimmit dáhttot ásahit ovttasbarggu Viessobáŋkkuin dainna mihtuin ahte Viessobáŋku ovdána dehálaš guovllupolitihkalaš doaibmagaskaoapmin mii sihkkarastá ássama ja buori demográfalaš ovdáneami Sámis.
Nannen dihtii sámi oktasašvuođa de lea min mielas dehálaš joatkit verddestallamiin.
Ovttasbargoguoimmit dáhttot čuovvulit doaibmabijuid mat dieđihuvvojit Sámediggedieđáhusas duoji birra ealáhussan (2018) ja mii fertet čielggadit organiserema ja resursageavaheami.
Mii fertet čuovvulit dálá mearkagálvohuksenprošeavttaid, duodjebagadalli ortnegiid ja gealboloktendoaibmabijuid.
Ovttasbargoguoimmit áigot doarjut daid buriid ovdamearkkaid mat fuolahit sámi kultuvrra ealáhusoktavuođas.
Ovttasbargoguoimmit dáhttot láhčit dili árbevirolaš máhtu sirdimii buolvvas bulvii.
Ii álggahit ođđa areálasisabahkkemiid mat unnidit ealáhusaid mearkkašumi sámi kultuvrii ja sámi servodagaide.
Mii galgat nannet árvohuksema vuođđoealáhusain eanet muohkademiin, biebmobuvttademiin ja báikkálaš biebmu vuoruhemiin.
Mii dáhttut bargat ahte boraspirenálit unniduvvojit mearriduvvon nállemihtuid hárrái, ja ahte vahátbivdu sáhttá jođánit ja beaktilit johtui biddjot buot vejolaš veahkkeneavvuiguin.
Mii háliidat nannet ja ovdánahttit boazodoalu bearašvuđot ealáhussan ja eallinvuohkin.
Sámediggi galgá leat guovddáš eaktobiddji boazodoallopolitihkkii, ja dan oktavuođas galgá čađahuvvot guorahallan boazodoallohálddahusas. Sámediggi galgá konsulteret Eanadoallodepartemeanttain ovdal boazodoallošiehtadusat vulget johtui.
Boazodoalloláhkalávdegoddi guorahallan mii gárvána ovdal 2021 jahkemolsuma galgá čuovvuluvvot dárkilit ja mii dáhttut ahte boazodoalloláhka reviderejuvvo.
Ovttasbargoguoimmit dáhttot láhkadovddasteami bokte sihkkarastit álbmogii guolástanvuoigatvuođaid ja suvdilis bivdohálddašeami bokte.
Mii dáhttut bargat ahte guollebiebman hálddašuvvo nu ahte gođđa- ja guolleguovllut eai biliduvvo ja ahte sámi vuoigatvuođalaččat vuhtii váldojuvvojit.
Mii dáhttut bargat eanet einnostahttivuođa ovdii eanadollui ja fokuseret oktasašdoaimmaide, investeremiidda, rekruteremii, čálgoortnegiidda ja gealboloktemii.
Mii áigut bargat ahte báikegottiid álbmogiid vuoigatvuođat ođasmahtti resurssaide ja sin guovlluide dovddastuvvojit ja ahte hálddašuvvo eamiálbmogiid ja sámi meahcástanvieruid vuođul.
Ovttasbargoguoimmit barget ahte ovddiduvvo ohcan mohtorjohtolahkii geahččalanlága vuođul.
Mii dáhttut bargat ahte dán sámediggeáigodagas ráhkaduvvo sámediggedieđáhus meahcásteami suodjaleapmin ja meahcásteami birra.
Ovttasbargoguoimmit dáhttot bargat dan ovdii ahte šaddá duohta báikkálaš bivdohálddašeapmi Deanučázádagas ja Deanu-soahpamuš mii dohkkeha vuoigatvuođalaččaid ja eamiálbmotbeali go hálddaša bivddu.
Mii dáhttut bargat ahte sámi álbmot dovddastuvvo eamiálbmogin vuođđolágas.
Mii dáhttut joatkit guhkesáigge bargguin nannet sámiid ja eamiálbmogiid vuoigatvuođaid sihke norgga ja riikkaidgaskasaččat.
Mii áigut vuolggahit doaibmaplána mii sihkkarastá ahte Norga doahttala ON eamiálbmot-julggaštusa (UNDRIP).
Mii dáhttut sihkkarastit ahte sámi servodat oažžu reaidduid ja bagadeami mo sáhttá dán vuoigatvuođa geavahit báikkálaččat.
Mii dáhttut oažžut saddjái ođđa dáru-ruoŧa boazoguohtunkonvenšuvnna. Viidásit mii dáhttut vuoruhit čuovvulit plánejuvvon minerálaláhkarievdadusaid, sihkkarastin dihtii ahte sámiid vuoigatvuođat vuhtii váldojuvvojit sihke eiseválddiid ja ruvkeindustriija bealis.
Mii dáhttut sihkkarastit ahte Sámediggi doarju sámiid geat dáistalit iežaset sámi kultuvrra ovdii, ja doarjut riekteproseassain go leat dehálaš ja prinsihpalaš áššit, daid strategiijaid vuođul maid Sámediggi lea mearridan.
Mii joatkit bargamis sámiid riektesihkarvuođa nannemiin.
Luondduriggodagaid reguleren ferte leat suvdinnávccalaš ja doahttalit álgoálbmotvuoigatvuođaid. Sihkkarastin dihtii dán de berre mearrasámiid vuoigatvuohta bivdui nannejuvvot lágain, nu mo sihke Riddoguolástuslávdegoddi ja Norgga olmmošvuoigatvuođainstitušuvdna leat ávžžuhan.
Mii dáhttut bargat ahte meahcceriggodagat, sáivačáhcebivdu ja luossabivdu sihke jogain ja mearas vuoruhuvvo báikkálaččaide ja vuoigatvuođalaččaide.
Mii dáhttut vuoruhit lassi loddeneriid oaččuhit, ja dáinna lágiin sihkkarastit ahte sihke ieš bivdu ja máhttu loddema birra sirdojuvvo boahttevaš buolvvaide.
Ovttasbargoguoimmit dáhttot nannet sámi dimenšuvnna riektevuogádagas, dohkkehit sámi riektegálduid ja riekteáddejumi, ja ovdánahttit sámegiela riektegiellan.
Mii háliidat maid dáhttut rievdadusaid njuolggadusain gustojeaddji dikkiid ektui, nu ahte buot sápmelaččain galgá vejolašvuohta loktet iežaset áššiid duopmostuolus mas lea gelbbolašvuohta sámi diliin.
Girjjálašvuohta, musihkka, luohti, festiválat, teáhter, duodji, dáidda, filbma, valáštallan, sámi gávnnadanbáikkit ja sámi girkoeallin leat oasit dan kulturpolitihkas man mii dárbbašit ja man mii dáhttut vuoruhit boahtte áigodaga.
Mii dáhttut vuoruhit digitála čovdosiid sámi girjjálašvuođajuohkašupmái, nannen dihtii sámiid vejolašvuođaid návddašit sámi girjjálašvuođa.
Mii dáhttut mánáide ja nuoraide buoridit olahanmuttu mánáid-tv:ii, nuoraidprográmmaide ja filmmaide.
Áigodagas galgá ráhkaduvvot mediadieđáhus, dainna mihtuin ahte nanne sorjjasmeahttun sámi preassa ja váikkuhit miehtá-sámi almmolašvuhtii.
Ovttasbargoguoimmit dáhttot váikkuhit dálá ásahusaid nannemii ja sihkkarastit ođđa ásahemiid.
Mii galgat sihkkarastit ahte prošeavttat mat leat biddjon johtui, nu mo sámi sámi dáiddamusea Kárášjohkii ja Áltá-Guovdageainnučázádaga dulvadeami dokumeanttašuvdnaguovddáš Mázii duohtandahkkojuvvojit.
Mii bargat dan ovdii ahte ásahuvvojit ásahuslaš ruovttut vueliei/luohtái/ vuollei ja árbedihtui ovttas eahpeávnnaslaš kulturárbái, ja vel ahte ásahuvvo sámi fanassuodjalanguovddáš.
Ovttasbargoguoimmit dáhttot bargat ahte sámi festiválaide ja gávnnadanbáikkiide galget sihkkarastojuvvot ovdánanvejolašvuođat. Mii dáhttut doarjut eanet ođđa sámi gávnnadanbáikkiid.
Ovttasbargoguoimmit dáhttot ásahit oahppoprográmma sámi dáidagii ja vuoruhit internationaliseret dáiddáršiehtadusa.
Áigodaga áigge dáhttot ovttasbargoguoimmit vuoruhit sámi sisdoalu sihke Bådåddjos, Eurohpalaš kulturoaivegávpot 2024:s, ja Veneziabiennale dálááiggedáiddačájáhusas.
Ovttasbargoguoimmit dáhttot ásahit sámi valáštallanšiehtadusa ja dan bokte nannet sámi valáštallama.
Sámit leat okta álbmot njealji riikkas ja ovttasbargoguoimmit áŋgiruššet ahte riikkarájit galggašedje nu unnán hehttehussan go vejolaš go mii ovttasbargat álbmogin.
SPR lea gáibidan ollislaš guorahallama das mo giddejuvvon rájit leat váikkuhan sámiide, ja dan mii dáhttut čuovvulit eiseválddiin.
Ovttasbargoguoimmit barget dainna guhkesáigge mihttomeriin ahte ásahuvvo oktasaš álbmotválljejuvvon ásahus. Mii dáhttut árvvoštallat mo fidnet oktasaš válgabeaivvi.
Mii dáhttut ovdánahttit sámi ovttasbarggu lasi skuvlaovttasbarggu bokte, ja bargat oktasaš oahppoplána ja oktasaš oahpahuspolitihka ovdii.
Mii dáhttut maid ovttasbargat dárbbašlaš rievdadusaid ovdii Davviriikkalaš sámekonvenšuvnnas.
Ovttasbargoguoimmit dáhttot bargat dásseárvosaš dearvvašvuođafálaldagaid ovdii sámi álbmogii. Sámi dearvvašvuođabálvalusat galget leat olámuttus buot sámiide, beroškeahttá gos ásset, maiddái riikkarájiid rastá.
Mii dáhttut čuovvulit “Spesialistadearvvašvuođabálvalusat olles sámi álbmogii”-strategiija (2021), ja ahte sámiid iešmearridanvuoigatvuohta mii čuovvu ILO169 art. 25 bokte galgá sihkkarastojuvvot go ovdánahttá dearvvašvuođabálvalusaid.
Mii dáhttut guorahallat mo sámi dearvvašvuođabálvalusat sáhttet hálddašuvvot, earret eará áigut árvvoštallat loktet Sámi Klinihka Dearvvašvuođa Finnmárkkus Dearvvašvuođa Davvi vuollái.
Mii dáhttut bargat Sámi Klinihka doaibmaguovllu viiddideami ovdii ja joatkit nannet psyhkalaš dearvvašvuođasuddjema SANKS:a nannema bokte.
Ovttasbargoguoimmit dáhttot bargat ahte sámi geahččanguovllut vuhtii váldojuvvojit go leat nationála dearvvašvuođaguoskevaš proseassat, dan bokte ahte sihkkarastit sámi ovddasteami buot dearvvašvuođaásahusain.
Mii dáhttut vuoruhit láhčit dili sámi dearvvašvuođabálvalusaid ovttasbargui ja ovdánahttimii gielddain.
Ovttasbargoguoimmit dáhttot joatkit doarjut sámi dearvvašvuođafierpmádagaid ja viiddidit dáid eanet surggiide.
Mii doarjut ahte ásahuvvo riegádahttin- ja heahtefálaldat Áltái. Mii dáhttut bargat nationála dulkonbálvalusa ovdii ja ahte ásahuvvo sámi digitála doavtterfálaldat.
Mii dáhttut bargat ahte sámi boarrásat ožžot árvvolaš dearvvašvuođa- ja fuolahusfálaldaga, mii váldá vuhtii eaŋkilolbmo identitehta ja historjjá.
Mii dáhttut joatkit ovdánahttit sámi geriatriijajoavkku Sámi Klinihkas, ja ovttasráđiid Sámi vuorrasiidráđiin hábmet sámi vuorrasiidstrategiija.
Ovttasbargoguoimmit dáhttot bargat sihkkarastin dihtii sámi mánáide ja nuoraide buriid ja dorvvolaš bajásšaddaneavttuid. Dát sisttisdoallá čielga áŋgiruššama veahkaválddálašvuođa vuostá lagaš oktavuođain ja muđui, ovdánahttit psyhkalaš dearvvašvuođabálvalusaid ja iešsorbmemiid eastadandoaibmabijuid hukset.
Mii dáhttut bargat struktuvrralaččat eastadit mánágeafivuođa sámi guovlluin.
Ovttasbargoguoimmit dáhttot nannet ovttasbargošiehtadusaid gielddaiguin, fylkkaiguin ja eará beliiguin main ovddasvástádus bálvalusain sámi álbmogii. Šiehtadusat galget váikkuhit buoret bálvalusaide.
Áigodagas dáhttot ovttasbargoguoimmit bargat ahte Sámedikki šiehtadusat dain stuorát gávpogiin fuolahit sámi álbmoga mánáidgárde- ja skuvlafálaldatdárbbuid, oahpahusfálaldaga ja sámi gielaid nannema, sámi gávnnadanbáikkiid ja dearvvašvuođa- ja kulturfálaldagaid.
Mii dáhttut vel ahte dahkko geahččaleapmi ásahit sámi profiilaskuvllaid oassin ovttasbargošiehtadusaiguin.
Dán áigodagas mii dáhttut gárvet barggu ovttasbargošiehtadusain Tråante suohkanin ja Innlandet fylkkasuohkanin. Mii dáhttut čuovvulit eanebuš proseassaid main lea dárbu ovttasbargošiehtadusaide.
Mii dáhttut bargat ahte eanet gielddat ja fylkkagielddat galget šaddat oassin sámegiela hálddašanguovllus.
Mii dáhttut earret eará vuoruhit čuovvulit ON álgoálbmotgiellalogijagi, ON Food System Summit, dálkkádatšiehtadallamiid ja Luonddumáŋggabealatvuođakonvenšuvnna.
Mii dáhttut maid nannet álgoálbmogiid vuoigatvuođa oassálastit ON ja eará riikkaidgaskasaš vuogádagain.
Mii dáhttut hukset Sámedikki politihkalaš ja hálddahuslaš návccaid, vai Sámediggi bastá dustet buot daid dárbbuid mat sámi servodagas gávdnojit.
Lea vuoruhanášši bargat lasi ekonomalaš rámmaeavttuid ovdii Sámediggái, mii lea bisánan vaikko leat stuorát barggut go ovdal.
Ovttasbargoguoimmit dáhttot jođánit bidjat johtui ollislaš guorahallama ja evaluerema teknihkalaš válgačađaheamis Sámedikki 2021 válggain, mas earret eará leat boahtán máhcahagat hástalusaid birra sihke jienastusloguin ja válgaeiseválddiid válgabohtosiid almmuhemiin.
Galgá biddjot johtui govda ja fátmmasteaddji lávdegoddi mas Sámediggeáirasat guorahallet mo sáhttá ođastit Sámedikki čoahkkinortnega.
Mii dáhttut nannet Sámedikki nuoraidpolitihkalaš lávdegotti nannemiin (SáNuL) dehálaš politihkalaš vuogádahkan man bokte sámi nuorat gullojit. SáNuL sáhttá earret eará váikkuhit ahte ráhkaduvvojit dorvvolaš gávnnadanbáikkit nuoraide ja ahte sámi mánát ja nuorat ožžot dieđuid ja oahpu Sámedikki doaimmaid birra.
Ovttasbargoguoimmit dáhttot vuoruhit viidásit čuovvuleami Riikkadárkkástusa cuiggodemiin raporttas Sámediggeráđi stivrenvuogádat mihtuid olahemiide (2019).
Ovttasbargoguoimmit leat ovtta oaivilis ahte ferte ráhkadit ortnega oasussállaša juohkimii Finnmárkkuopmodagas (FeFo), ja áibba álggus áigodagas de ovddiduvvo áššin Sámedikki dievasčoahkkimii Finnmárkkuopmodaga oktasaš stivrrejumi birra.
Ovttasbargoguoimmit oaivvildit ahte Sámedikki lassáneaddji áššehivvodat dahká dárbbašlažžan árvvoštallat livččiigo buorre hálddašit muhtun áššesurggiid direktoráhtamodeallain. Kulturmuitohálddašeapmi ja báikenammabálvalus lea muhtun dain surggiin maid berre árvvoštallat.
Mii dáhttut dán Sámediggeáigodagas sihkkarastit starga stivrrejumi mas maiddái Sámedikki unnitlogus galget leat buorit bargoeavttut.
Mii dáhttut fuolahit ahte Sámediggi, nu mo eará ge álbmotválljejuvvon ásahusat, šiehtadallá ja gávdná bohtosiid ja addá saji politihkalaš digaštallamii.

Gáldu: Beaiveálgu-julggaštus

Ođđasat - Davvisámegillii

28. april 2024 kl. 10:24
Kom på 65. plass i EM i turn

Loga sámegillii.

Peder Funderud Skogvang kom på 65. plass i årets turn-EM i Rimini i Italia.

Det skriver Norges Gymnastikk- og Turnforbund på sine egne nettsider.

Peder hadde noen feil som gjør at han ikke kjører sin beste mangekamp i dette EM, skriver forbundet. 24.-28. april arrangeres EM i turn for menn, junior og senior.
Ođđasat - Davvisámegillii

28. april 2024 kl. 10:21
Bođii 65:in turn EM:as

Les på norsk.

Peder Funderud Skogvang bođii 65:in dán jagi turn Eurohpá-meašttirgilvvuin Riminis Itálias.

Dan čállet Norges Gymnastikk- og Turnforbund iežaset neahttasiidduin.

Pederis ledje moadde boasttuvuođa, mat dagahedje ahte ii šaddan dat buoremus gilvu dán vuoro, čállá searvi. Almmáiolbmuid junior ja senior gilvvut leat miessemánu 24. beaivvi rájes gitta 28. beaivái.
Ođđasat - Davvisámegillii

27. april 2024 kl. 18:09
Háliidit priváhta dearvvašvuođafálaldaga Áltái

Álttá Bargiidbellodat, Guovddášbellodat ja Gurutbellodat lea bargagoahtán oččodit priváhta dearvvašvuođafálaldaga, Aleris bokte.

Dát ii soabat ráđđehusa strategiijain. Ráđđehus áiggošii uhcit priváhta dearvvašvuođabálvalusaid.

– Buot buoremus livčče dieđusge jos mis livčče almmolaš dearvvašvuođafálaldat mii nagoda buohkaid dikšut, muhto nu ii leat. Álbmoga bálvalusat leat buot deháleamos, ja mun sávan dat duohtandahkko, dadjá Álttá Bargiidbellodaga Ole Steinar Østlyngen, ja čujuha priváhta dearvvašvuođafálaldahkii.

Altaposten muitalii áššis vuosttažin.

Ráđđehusas eai ge doarjjo dán barggu.

– Geavahit resurssaid hukset priváhta fálaldaga, ii atte buoret dikšofálaldaga álbmogii. Dušše sidjiide geain lea ráđđi máksit iežas lupmas, čállá Dearvvašvuođa- ja fuolahusdepartemeantta stáhtačálli Karl Kristian Bekeng e-poasttas NRK:i.

Kantar iskos čájeha ahte gávccis logi olbmos háliidit priváhta ja almmolaš buohcciviesuide eanet ovttasbarggu, čoavdin dihtii dearvvašvuođabálvalusa hástalusaid, muitala Anita Tunold, Aleris hálddašeaddji direktevra.

Ii ge leat vuos mearriduvvon ahte Aleris ásahuvvo Álttá gildii.

– Jus mii áigot ásahit fálaldaga ođđa báikái, de fertet mii ásahit fálaldaga mas lea buorre dássi, ja ahte dat lea ekonomalaččat gánnáhahtti. Dat leat min prinsihpat, beroškeahttá gosa mii galgat, dadjá Tunold.

Her vil Ap ha private helsetjenester: – Vi snur alle steiner

Mens regjeringen vil ha mindre private helsetjenester, jobber deres partifeller i Finnmarks mest folkerike kommune for det motsatte.
Av Erlend Hykkerud

Dá lea dat ođđa sámediggeráđđi

Presideanta Silje Karine Muotka (46)

Ráđđeláhttu Runar Myrnes Balto (34)

Ráđđeláhttu Mikkel Eskil Mikkelsen (32)

Ráđđeláhttu Maja Kristine Jåma (28)

Ráđđeláhttu Hans Ole Eira (49)

Beaiveálgu-julggaštus

Ta NRKs valgomat

NRK Sápmi – davvisámegillii

Gáibidit ođđa mieđihanlága: – Mii dárbbašat olbmuid geat beroštit

FA Sámi hárjeheaddji: – Min ossodagas leat garraseamos joavkkut

Sámediggeválggat / Sametingsvalget 2021

Disse er oftest borte fra Sametinget

Sámediggi

Kristin (25) imaštallá lea go sus riekti leat jienastuslogus

Mer fra NRK Sápmi

Gáibidit ođđa mieđihanlága: – Mii dárbbašat olbmuid geat beroštit

FA Sápmi: – Vi er nok kommet i den vanskeligste gruppa

Korte nyheter

Kom på 65. plass i EM i turn

Bođii 65:in turn EM:as

Háliidit priváhta dearvvašvuođafálaldaga Áltái

Her vil Ap ha private helsetjenester: – Vi snur alle steiner

Langlesing

Oaivvilda sápmelaččaid suoládan historjjá

Mener hun kan lukte når døden nærmer seg

Oaivvilda dovdat erenoamáš hája go jápmin lahkona

Gahčosat

Quiz: Kan du disse lulesamiske ordene knyttet til påskeferien?

Mii dáhpáhuvai ođđajagimánus?

Gažus: Maid dieđát beaivváža birra?

NRK Sápmi

Kontakt

Hjelp

Tjenester

Produksjon

Salg

Presideanta Silje Karine Muotka (46)

Ráđđeláhttu Runar Myrnes Balto (34)

Ráđđeláhttu Mikkel Eskil Mikkelsen (32)

Ráđđeláhttu Maja Kristine Jåma (28)

Ráđđeláhttu Hans Ole Eira (49)

Beaiveálgu-julggaštus

Ta NRKs valgomat

Gáibidit ođđa mieđihanlága: – Mii dárbbašat olbmuid geat beroštit

FA Sámi hárjeheaddji: – Min ossodagas leat garraseamos joavkkut

Disse er oftest borte fra Sametinget

Kristin (25) imaštallá lea go sus riekti leat jienastuslogus

Gáibidit ođđa mieđihanlága: – Mii dárbbašat olbmuid geat beroštit

FA Sápmi: – Vi er nok kommet i den vanskeligste gruppa

Kom på 65. plass i EM i turn

Bođii 65:in turn EM:as

Háliidit priváhta dearvvašvuođafálaldaga Áltái

Her vil Ap ha private helsetjenester: – Vi snur alle steiner

Oaivvilda sápmelaččaid suoládan historjjá

Mener hun kan lukte når døden nærmer seg

Oaivvilda dovdat erenoamáš hája go jápmin lahkona

Quiz: Kan du disse lulesamiske ordene knyttet til påskeferien?

Mii dáhpáhuvai ođđajagimánus?

Gažus: Maid dieđát beaivváža birra?

Vi arbeider etterVær Varsom-plakatens reglerfor god presseskikk.

Kontakt

Hjelp

Tjenester

Produksjon

Salg

Vi arbeider etter
Vær Varsom-plakatens regler
for god presseskikk.