NRK Meny
Normal

Dá lea BeskánLuossaRocka váldoártista

BeskánLuossaRock leat rámis go dán jagáš váldoártistan lea Jon Henrik Fjällgren.

Jon Henrik Fjällgren

Jon Henrik Fjällgren lea unnán dihtton almmolašvuođas maŋŋel 2015 melodifesivalena, gitta dán jagi rádjai. Dán geasi son guoimmuha olbmuid Bieskkenjárggas Kárášjogas.

Foto: Vaino Rensberg / NRK

– Mii leat hui rámis go leat nagodan dákkár stuorra ártistta oažžut. Mii illudat konsertii, čállá BeskánLuossaRock:a jođiheaddji Biret-Elle Arne Ettá Stige/Stig Arne Somby preassadieđáhusastis.

John Mathis Utsi

John Mathis Utsi juoigá maid BeskkánLuossaRockas.

Foto: Tor Inge Lima

BeskánLuossaRock lágiduvvo Bieskkenjárggas Kárášjogas suoidnemánu vuosttaš ja nuppi beaivve.

Fjällgren lea máttasápmelaš juoigi ja badjolmmoš. Son šattai dovddusin go golmma jagi dassái vuittii Ruoŧa taleantagilvvu «Talang Sverige».

Son lea maid oasálastán Ruoŧa Melodifestiválas guovtte geardde, maŋimuš dán jagi.

Fjällgren almmuhii iežas vuosttaš skearru jagis 2015, ja nuppi skearru njukčamánus dán jagi.

Čeahpes juoigit

BeskánLuossaRockas lea vierru bovdet Sámi Grand Prix vuoitiid lávdái. Dán jagi leat sii bovden juoiganoasi vuoiti, mázelačča John André Eira.

– Son rohttestii luđiid diibmá min lávddis, čilge Somby.

John-Andrè Eira

Sámi Grand Prix-vuoiti John André Eira juoigá Bieskkenjárggas dán jagi.

Foto: Vaino Rensberg / NRK

Bieskkánlávdái lávke maid nubbi juoigi, kárášjohkalaš John Mathis Utsi. Son lea maid oasálastán ja vuoitán Sámi Grand Prix juoiganoasi.

Son faskii vuoittuid jagiin 2004 ja 2010. Son lea maid bieskkániid lávddis finadan ovdal.

Dán geasi ilbmá su vuosttas luohteskearru. Son lea čilgen mediaid bokte iežas liikot dajahallat luđiin, dakkár dajahallan mii buktá guldaleaddjái jurdagiid maid sáhttet dulkot.

Ođđaáigásaš musihkka

Suoma beale Sámis boahtá Ravggon, mii lea gelddolaš álbmotrockjoavku Vuohčus eret. Ravggon almmuhii vuostašskearru «Ráji ravddas» jagis 2016.

Sii áŋgiruššet gáhttet birrasa, lagašguovllu ja kultuvrra, dat maid vuhtto Rávggona lávlagiin.

Ravggon

Ravggon lea okta joavkkuin maid sáhtát vásihit Kárášjogas suoidnemánu vuosttaš beaivve.

Foto: Pressebilde

Norgga beale sámi duo Arvvas seaguha luđiid ja lávlagiid mat gullet iešguđetlágan musihkkašlájaide.

Guovdageaidnolaš Sara Marielle Gaup Beaska ja Steinar Raknes leaba ovttas čuojahan jagi 2014 rájes. Steinar Raknes lea norgalaš jazzmusihkkár, gii čuojaha kontrabássa.

Arvvas, Sara Marielle Gaup Beaska og Steinar Raknes

Sara Marielle Gaup Beaska ja Steinar Raknes leaba Arvvas joavkku duogábealde.

Foto: Pressebilde

Sara Marielle Gaup Beaska lea juoigi, ja su dovdat earret eará Adjágas joavkkus.

BeskánLuossaRock 2017 loahpaha beakkán Kárášjoht garrarock- ja «heavyjoik»-joavku Intrigue.

Intrigue

Intrigue geasuha olu gehččiid. Suoidnemánu álggus sii čuojahit Bieskkenjárggas Kárášjogas.

Foto: Sergey Gavrilov / Gavrilov Media