Čállán: Anna Anita Hætta Guttorm
Jagi 2008 háliida Ordkalottena fesiválagenerala, stivrrajođiheaddji, Marry Ailonieida Somby bovdet stuorráid nugo artistta ja girječálli Leonard Cohena, dovddus musihkára, poehta ja politihkálaš aktivista, sioux indiáná John Trudella, ja Norgga prinseassagemala, girječálli Ari Behna.
– Ollusat gáđaštit Ari Behna go lea prinseassain náitalan, muhto son lea čeahpes girječálli ja bures boahtin Ordkalottenii. Mii liikot earaláganiidda. Váldofokus jagi 2008 Ordkalottenis šaddá indiánaid girjjálašvuohta.
Dán jagáš Ordkalotten lágiduvvoi mannan vahkus Romssa gávpogis. Ruoššabeale dálááigge girjjálašvuohta lei fáddán dán jagáš Ordkalottenis. – Norgga stahtii lea dehálaš nannet kultuvrralaš ovttasbarggu, vel álbmogiid gulahallan, ja ealáhusaid ovttasbargu doaibmá vel buorebut, lohká Marry Ailonieida Somby.
Kulturdepartemeantta ráđđeaddi, Bendik Rugaas logái Ordkalottena doaluid vuolde ahte lea ráđđehusa čielga oaidnu ahte maiddái eamiálbmot dimenšuvdna gullá lunddolaččat dávviguovlluid politihkkii, maiddái kultuvrralaš ja girjjálašvuođa ovdánahttimis.
– Sallošan sakka go buot min guossit eai ollen festiválii nugo šihtton, Jostein Gaarder šáttai buohcci, ja eaba Anatolij Pristavkin ja Tatjana Tolstajage ollen festiválii. Muhto almmatge šáttai Ordkalotten davviguovlluid girjjálašvuođa ávvudeapmin, lohká Somby.
Ordkalottenii bohte stuorrái nugo Andrej Kurkov, Thorvald Steen ja Herbjørg Wassmo. Filosofa ja girječálli Thorvald Steen lea earet eará jorgalan avantgarde poehta Daniil Kharms (1905-42) girjji ”Den blå notisboken” darogilli ovttas Ulla Backlundain. Kharms biddjoi Stalin-áigge máŋgga geardde giddagassii, ja jámi njealggis. Dálá áigge rehkenastto Daniil Kharms okta dáin stuorámus ovdagovain dan post-sovjeta, ruošša avantgardii. Steen logai divttaid Kharms áidna diktagirjjis maid Stalin áigge beasai almmuhit.
Olu olbmot ledje boahtán gullat Synnøve Persena ovttas Romssa symfoniija orkesteriin, festivála oasseváldit besse maid vásihit Rauni Magga Lukkari (Ávvudivttat jorgaluvvon) , Sigbjørns Skåden (Skuovvadeaddjiid gonagas), Ragnhild Nilstun (Min reise ender her) ja Ingeborg Arvola (40 postkort) lohkamin iežaset ođđa girjjiin.
Marry Ailonieida Somby rabmo Sámi Girječálliid Searvi Sigbjørn Skådena go nu čehpet jođihii rahpama. - Simon Marainenas lei beaktilis juoigan ja ruoššabeale neavttár logai poesiija nu olu dovdduiguin, orui measta dego eŋgela suoját livčče guoskkehan mu váimmu.
