– Dosa mun vudjen. Do dat lea dat báiki gokko lea čáhppat dat jiekŋa. Diekko lea rabas suddi. Ii leat go logi sentii muohta mii gokčá sutti.
Lákkonjárgga boazodoalli Anders Nils Buljo lei vuoddján ealo lusa Heammogiettis Guovdageainnu suohkanis sotnabeaivve beannot vahkku áigi go bártidišgođii.
– Skuter doddjogođii ja čáhci boršugođii. Mus ii lean go attistit gása. Geahččalit beassá go rastá. Skutersabehat bohte jieŋa nala, ja de goazastii reahka. Skuter bisánii, muhto ollejin juste nu lahka gátti, ahte mun nagodin njuiket gáddái.
Áigu nannet dorvvolašvuođa
Maŋŋel lihkohisvuođa doarggistišgohte Ántes gieđat. Sutnje lei dáhpáhus hui ilgat ja dál son árvvoštallá oastit ođđaáigásaš rusttegiid mat nannešedje dorvvolašvuođa bargodilis.
– Na duokkára goit oaivvildan oastit. Dreassa. In mun gal eará dieđe, dadjá son.
Ánte geahčada dihtoris olgguldasbiktasa mii govdu čázis. Jus son livččii vudjon etnui, de jáhkká ahte dát bivttas livččii sáhttán gádjut su heavvaneamis.
Boazodoallu várálaš bargu
Ruoŧa beale Sámis čájehit almmolaš logut, ahte riikkas duššet gaskamearálaččat golbma boazodoalli jahkásaččat.
Norgga bealde ges leat dušše eahpealmmolaš logut mat čájehit ahte okta guokte boazodoalli duššet jahkásaččat.
Suoma bealde eai leat eahpealmmolaš logut ge dása, muhto boazodolliid njunuš Anne Ollila dadjá ahte boazodoallit hárve bártidit.
- Loga:
- Loga:
Boazodoalloeisseválddit oste gádjunrusttega
Finnmárkku fylkkamanni vuolitdirektevra Adam Klemet Hætta čájeha satelihttarusttega, mii gájui boazodoalli heakka diibmá, ja nu sii mearridedje oastit dán sin bargiide.
– Dás lea dakkár rukses boallu ja go dan deaddela, de manná diehtu Norgga beale váldogádjunguovddážii mii bidjá johtui doaibmabijuidis, dadjá Hætta.
Satelihttarusttegiin sáhttá sáddet dieđu eanáš báikkiin gokko mátketelefovnnain ii sáhte.
Divrras rusttegat
Finnmárkku fylkkamannis ii leat makkárge sihkarvuođaovddasvástádus boazodolliide, go juohke boazodoalli lea ásahan fitnodagaža, ja danne sis lea alddiineaset ovddasvástádus sihkarvuhtii.
Ođđaáigásaš rusttegat gájoše heakka, muhto dat leat divrasat oastit.
– Boahtte skábmii mun jurddašin oastit dán dreassa. Ii dán jagi várra šat dárbbaš dán, dadjá Ánte.
– Ja boahtte čavčča mii gal dieđus ge eat šat muitte dien oastit, dadjala Ánte ovttasássi Ellen Cecilie Triumf.
– Na jua dat dat gal lea bahá, vástida Ánte.