Hopp til innhold

Korte nyheter

  • 100.000 ruvnnu ii-binára gáktekursii

    Skeivt kulturår juolluda 100.000 ruvnnu Garmeresa ii-binára gáktekursii, mii lágiduvvo Skienis miessemánu 26.-28.b. Márkomeannu oažžu gis 100.000 ruvnnu sin prošektii «Ain Queering Sápmi», čállá Kulturráđđi. Lea Kulturráđđi mii juohká Norsk Tipping badjebáhcaga Skeivt kulturår 2022 doaimmaide ja doaluide.

    Riddu Riđđu Festivála ozai 50.000 ruvdnosaš doarjaga iežas prošektii «Tause temaer i Sápmi: Kropp, seksualitet og grenser», muhto ohcamuš hilgojuvvui.

    Garmeres skeive samer
    Foto: Stina Aletta Aikio
  • Juohke logát lávggodan jiekŋačázis

    Dán dálvve lea 12 proseantta norgga álbmogis lávggodan jiekŋačázis dahje ráddačázis. Nu čájehit Norgga olgoladdan searvvi dutkamušat go leat kárten norgalaččaid olgoladdan doaimmaid.
    48 proseantta sis geat vástidedje iskkadeami, leat leamašan ovtta čuoigan mátkkis. Ja juohke njealját ges vástida ahte lea idjadan olgun dán dálvve.

    Isbading i Suohpatjohka
    Foto: Ronald Pulk / NRK
  • Sámi Dáidda­guovddáža ođđa direktevra

    Sámi Dáiddaguovddáš ovttadat (SDG) stivra lea virgádan 38-jahkásaš Marija Griniuk ođđa direktevran mearreáigevirgái njealji jahkái, Sámi Dáiddaguovddážii. Nu čállá Sámi Dáiddaguovddáš neahttasiiddustis.

    Marija Griniuk lea Litauenis eret ja sus lea ukrainalaš duogáš. Son lea ássan moanaid jagiid Københámmanis, Dánmárkkus. Griniuk hállá 6 giela, dánska-, litauen- , ukraina-, eŋgelas-, ruošša- ja polska giela. Sus lea nana dáiddafágalaš máhtolašvuohta ja viiddis bargohárjáneapmi jođiheames, kurateremis, gaskkusteames, ekonomiijas ja márkanfievrrideames. Son bargá dutkin ja loahpaha dál doavttergrádastis Árktalaš dáidda ja hábmen-fakultehtas Roavvenjárgga Universitehtas.

    Son bargá sihke visuáladáiddárin, dutkin, kuráhtorin ja jođiheaddjin dáiddasuorggis ja danin leat sus buorit vásáhusat buot surggiin main SDG boahttevaš direktevrras dárbbašuvvojit. Marija Griniuk fárre bearrašiinnis Kárášjohkii ja álgá bargui suoidnemánu 25.beaivvi

    Marija Griniuk lea virgáduvvon Sámi dáiddaguovddáža ođđa jođiheaddjin
    Foto: Stiftelsen Sámi Dáiddaguovddáš / SDG