NRK Meny
Normal

– Stáhta geigii suolagálvvu FeFoi

NSRa njunnoša mielas ii leat Finnmárkku eatnamiid ja čáziid oamastusvuoigatvuohta nu movt dat galgá leat.

Beaska Niillas

Beaska Niillas sárdnida NSRa riikkačoahkkimis Álttás.

Foto: Robin Mortensen / NRK

– Stáhta suoládii ja geigii suolagálvvu FeFoi. Die dat lea dat boastu vuolggasadji. Stáhta máhkaš oamastii Finnmárkku ja de dan suolagálvvu geigii FeFoi. Dat lea áibbas endorii ja boastut,

Norgga Sámiid Riikkasearvvi(NSR) jođiheaddji Beaska Niillas oaivvilda ahte Finnmárkku eatnamiid ja čáziid oamastusvuoigatvuohta-proseassa ii leat čađahuvvon vuoiggalaččat.

Finnmárkkuopmodaga(FeFo) direktevra Jan Olli vástida diesa ná

– Mis ii leat makkár ge oaidnu diesa. Mii čuovvut Finnmárkolága, dadjá Olli.

– FeFo dušše gaskaboddosaš hálddašeaddji

NSRa jođiheaddji Beaska Niillas lei njunnošis Álttás dán vahkkoloahpas go NSRa riikkačoahkkin mearridii mii galgá čuožžut NSRa válgaprográmmas boahtte jagáš Sámediggeválggain.

Dan oktavuođas leat su čuoččuhusat beaggán, go media čálii áššiid dán birra.

NSRa Beaska Niillas deattuha ahte FeFo ii leat ásahuvvon agibeaivái, nugo son dulko Finnmárkolága.

– FeFo ásahuvvui dáinna ulbmilin ahte gaskaboddosaččat hálddašit Finnmárkku eatnamiid dássážii go Finnmárkokommišuvdna lea čielggadan vuoigatvuođaid, dadjá son.

FeFo direktevra čujuha Norgga riektevuogádahkii.

– Mii fertet vuordit dássážii go Finnmárku kommišuvdna geargá iežas bargguin, ja dat leat duopmostuolut mat galget mearridit dien ášši, dadjá Jan Olli.

FeFo čuokkis NSRa prográmmii

NSR riikkačoahkkin mearridii sotnabeaivve FeFo-čuoggá iežas válgaprográmmii, muhto válgaprográmmas sihkkojuvvui dat oassi maid Beaska Niillas čuoččuha.

"FeFo lea gaskaboddosaš hálddašeaddji Finnmárkku eatnamiidda ja čáziide."

– Diet gaskaboddosaš hálddašeaddji oassi ii heiven NSRa prográmma čuoggá cealkagii, čilge Beaska Niillas.

Prográmmii goitge bisánii FeFo čuokkis dáinna lágiin:

"NSRa oaivvilda ahte Finnmárkkuopmodat iežas doaimmain galgá ollašuhttit Finnmárkolága ulbmilparagráfa."

Aili: – FeFo ii ollašuhte ulbmilparagráfa

Dálá Sámediggepresideantta ja easka válljejuvvon NSRa presideantta evttohas Aili Keskitalo ii ane seammá garra sániid go Beaska Niillas, muhto čuoččuha ahte FeFo ii ollašuhte Finnmárkolága ulbmilparagráfa.

– FeFo ii ollásit deavdde Finnmárkolága ulbmilparagráfa. Dan ahte sii galget hálddašit eatnamiid ja čáziid Finnmárkkus earenoamážit sámi kultuvrii buorrin, dadjá son.

FeFo direktevra ii mieđa dasa ahte sii eai ollašuhte paragráfa.

– Mii ollašuhttit ja deavdit dien paragráfa, vástida Jan Olli diesa.