– Mii vuoittit válggaid!
Nu dadjalii Aili Keskitalo sárdnestuolus go riikkačoahkkin ovttajienalaččat vallji su láidestit bellodaga boahtte jagáš sámediggeválggaide.
- Loga maid:
NSRa jođiheaddji Beaska Niillas ii buktán ovdán eará evttohasaid presideantta evttohassan. Ii ge oktage evttohan ovtta ge eará vuosteevttohassan.
Go ii lean vuosteevttohas, de doškogohte gieđaid lagabui čuođi NSR-miellahtu Áltá Thon hoteallas, gos riikkačoahkkin lágiduvvo.
– Giitan luohtamuša ovddas
Dálá sámediggepresideantta Aili Keskitalo lea guhka doaimmahan sámi politihka, ja danin son lei jurddašan bures ovdagiittii vuolgá go bellodaga presideantta evttohassan.
– Dat dieđus ge ii leat diehttelas ášši ahte politihkar gii lea guhka bargan politihkarin oažžu fas luohtamašvuođa. Politihkkaris lea váttis bargu duhtadit buohkaid, go jođánit sáhttá boastu ášši válljet doarjut, dahje muđui beahttit jienasteddjiid.
Son deattuhii iežas oanehis sártnis man gáibideaddji lea vuolgit sámediggepresideantta evttohassan.
– Jurddašin guhka ovdal go válljejin fállát iežas fas evttohassan sámediggeválggaide, dan dihte go mun dieđan maid dat gáibida. Mun dieđan maid boahtá gáibidit mus ja maid dat boahtá gáibidit dis. Giitan luohtamuša ovddas. Dat lea hui divrras munnje.
Nu sárdnidii bivnnuhis Keskitalo sárdnestuolus gii fertii gohččut rumašgielain riikkačoahkkima oasseváldiid heaittit doaškumis gieđaid, ovdal go oažžui sátnesaji giitit sin.