Lei ikte ahte Bargiidbellodaga Sámediggeáirras, Ronny Wilhelmsen cuiggodii Sámedikki eanetlogu ja dajai ahte Sámedikki eanetlohku ii vuoruhan doarjut Bargiidbellodaga gáibádusa oažžumis lassi ruđaid oktasaš vuoigatvuođaid kártenbargguide.
Evttohii 15 miljovnna ruvnno
Bargiidbellodat lei gáibidan 15 miljovnna ruvnno mii galggai nannet Finnmárkokommišuvnna, Meahcceduopmostuolu ja Sámi Vuoigatvuođalávdegotti II kártenbargguid. Wilhelmsen čuoččuhii ahte Sámedikki eanetlohku baicca dáhttu ahte Sámediggi galggai leat oasálaš riekteproseassain sidjiide veahkkin geat iskkadit vuoigatvuođaideaset dikki ovddas
Ii riekta
Dát gal ii leat riekta, dadjá Sámediggeráđđi Ann-Mari Thomassen. Son dadjá Sámediggeráđi garrasit bargan ráđđehusa ektui, ja stáhtabušeahtas lea juo evttohuvvon 16 miljovnna ruvdno dán bargui. Thomassen iige loga riekta ahte Sámediggi jurdda ja áigumuš lea searvat riekteproseassaide.
– Sámediggeráđi evttohusas lei áigumuš sihkkarástit sámi kultuvrra luonddovuođu, ja dása dárbbaša Sámediggi eanet ressursaid sihke hálddalaččat ja ekonomalaččat, dadjá Sámediggeráđđi, Ann-Mari Thomassen.
Imašlaš bargovuohki
– Sámedikkis lea ásahuvvon sierra doarjjavuogádat mas lea vejolašvuohta ohcan doarjaga kártenbargguid ráhkkaneapmai. Dán ortnega lea Sámedikki eanetlohku, mas maiddái Bargiidbellodat lea mielde, dorjon, ja de gal imaštan go Bargiidbellodat dál evttoha dien ortega heaittihuvvot, dadjá Ann-Mari Thomassen.
Thomassen dadjá ahte son lea áibbas ovttamielalaš Bargiidbellodagaidn ahte dárbbašuvvo eanet ruhta SRU II kártenbargguide, ja danin son ipmášta go Bargiidbellodat evttohii sihkkut Sámedikki doarjjaortnega, mas juste lea vejolašvuohta ohcat doarjaga juste dása.
