Sii eai leat váttisvuohtan dáppe, oaivvilda áiddo ásahuvvon turistafitnodaga eaiggát dasa, go Báhccavuonas lagabui 100 vuodjenbeatnaga,guovtti beanagárddis leat dán čavčča dagahan ahte Geaggánvuomi čearu boazoeaiggát ii beasa johtit dálveorohahkii, ja máŋga bohcco leat juo mannan muohtariđđui.
Dál dáhttu Geaggánvuomi čearu boazoeaiggát, Nils Ánte Blind jávkadit beanafitnodaga Dápmotvuovddis, Báhccavuonas.
- Sidjiide gal lea váttisvuohta dán beanafitnodagas, doppe lea olu beatnagat, olbmot ja sii lihkadit olu guovllus, gos lea bohccuid lunddolaš johtolat. Son vásiha, ahte sii eai buohkat čága deike, fitnodat galgá vuolgit eret dáppe, ii sin ovttasbargu doaimma, váikke dán gohčodit oktasašbargun, muhto dat ii doaimma, dasa dárbbašuvvojit guktot bealit, lohka Blind.
(Artihkal joatkašuvvá gova vuolde)
Bohccot eai duostta vulos gáissás, go leagis lea nu olu riedja.
Foto: Klemet Anders Sara / NRK
2007:as álggahii Hans Olav Eriksen beanavuodjin turistafitnodaga, Lyngenfjord Adventure Dápmotvuovdái, Báhccavuona suohkanii, mas dál leat 50 vuodjenbeatnaga. Maŋŋelaš son ásahii maid Målselhuskey beanagárddi, mas leat seamma olu beatnagat go Lyngenfjord Adventures. Dát gárdi lea priváhta eatnamis.
Lobálaš doaibma
Lyngenfjord Adventure eaiggát, Hans Olav Eriksen ii ipmir manne Nils Ánte Blind dáhttu sin fitnodaga heaittihit doaimmaid guovllus, go dát han lea dál dohkkehuvvon sihke boazodoalu ja suohkana bealis.
- Dát šattašii váivi, sis lea sullii 30 báikkálaš bargi dáppe. Sin vistithan leat priváhta eatnamis, mii lea dohkkehuvvon turismma doaimmaide ja dat lea dohkkehuvvon sihke gielddas ja fylkkamánnis. Dat maid bidjui gulaskuddamii boazoorohahkii, mii dasto dohkkehii doaimmaid, muitala Eriksen.
Gidde johtolaga
Boahtte vahkku galgá Boazodoallohálddahus ja Romssa boazodoallostivra digaštallat mo čovdet váttisvuođa, dadjá Romssa boazodoalloagronoma, Ánte Bals.
- Sis leat dieđusge siste dien plánabarggus, sii leat ožžon dieđu, ahte detáljaplána ráhkaduvvo. Sis leamaš maid okta čoahkkin, gos hálddahusa oaidnu lea muitaluvvon. Diet doaibma váikkuha dien guovllus nu, ahte dat gidde boazojohtolaga, čilge Bals.
Jus diet fitnodat beassá joatkit doaimmaid dien dásis ja daid áigodagain goas háliidit, mearkkaša dat, ahte johtingeaidnu lea giddejuvvon ja dalle lea rihkkumin boazodoallolága. Dien beallái lea guovllustivrra ja sii bidjamin deattu, gávdnat buori čovdosa nu, ahte besset johtit bohccuin ráfis, dadjá Ánte Bals.
GULDAL:
