Ráhkkanit čálligoahtit golmma sámegillii

– Mis lea hállu geahččat vejolašvuođaid buvttadišgoahtit áššiid julev- ja máttasámegillii, dadjá Ávvira váldodoaimmaheaddji Kari Lisbeth Hermansen.

Kari Lisbeth Hermansen

Ávvira váldodoaimmaheaddji Kari Lisbeth Hermansen háliidivččii ahte su áviisa sáhtášii fállagoahtit ođđasiid golmma sámegillii.

Foto: Marie Elise Nystad

– Min dáfus bođii dát ođas hui vuohkkasit, go mii leat dál juste bargamin áviissa ovdánahttinplánaiguin ja lassiruhta dieđusge addá sihke movtta ja vejolašvuođa hutkát mo buoridit buktagiiddámet, sihke báberáviissa ja min digitálafálaldagaid, lohká Hermansen NRK Sápmái.

Olgeš, Ovddádusbellodat ja Kristtalaš álbmotbellodat árvalit sámi áviissaide vihtta miljon ruvnnu lasi.

Ávviris leat jo geahčadišgoahtán mo sáhtášedje addit fálaldaga julev- ja máttasámegllii maid.

– Mis lea maid hállu geahččat makkár vejolašvuohta mis lea viiddidit min fálaldaga eará sámegielaid dáfus ja buvttadišgoahtit áššiid eará sámegielaide, čilge váldodoaimmaheaddji.

– Eambbo journalisttat

Ráđđehusa álgo bušeahttaárvalusas ledje evttohan lasihit preassadoarjaga sámi aviissaide dušše 670.000 ruvnnuin.

Geir Wulff

Ságat váldodoaimmaheaddji Geir Wulff.

Foto: Dan Robert Larsen / NRK

Jus dát bušeahttaárvalus dohkkehuvvošii, de mearkkaša dat ahte sámi áviissaide boahtte jagi juolluduvvošii oktiibuot lagabui 29 miljon ruvnnu.

Váldodoaimmaheaddji Geir Wulff čilge ahte dán lassáneamis manašii sullii 2 miljon ruvnnu Ságaide ja 3 miljon ruvnnu Ávvirii.

– Dát attášii guktuid áviissaide vejolašvuođa bálkáhit eambbo journalisttaid ja ráhkadit vel ain buoret áviissaid. Ii dušše guovddáš sámi ássanguovlluin, muhto olles Sámis, illosa Wulff.