Gáldu: NTB
Máŋga duhát olbmo leat vuolláičállán kampánjii, mas evttohit sirdit koálaguovžžaid Austrálias ránnjáriikii Aotearoai. Duogáš dása lea meahccebuollimat mat leat billistan stuora guovlluid Austrálias dan maŋemuš áigge.
Koálaguovžžat leat measta jo oalát nálihuvvan Austrálias, ja sáhtášii seailluhit náli jus daid sirddaše Aotearoai, daddjo kampánnjas, maid badjel 6500 olbmo leat vuolláičállán mánnodaga.
Viidáset čuoččuhuvvo ahte dat ii boađe billistit Aotearoa mehciid, go koálaguovžžat orrot rabas eukalyptus- vuvddiin, gos borret dáid muoraid lasttaid.
Ii leat nu álki
Muhto doalvut eksohtalaš náliid ođđa guovlluide ii leat nu álki ja dat sáhttá čuohcat sihke guvlui ja elliide mat jo leat doppe. Nu lohká Sydney universitehta dutki Dr. Valentina Mella.
Kampánnjas deattuhuvvo ahte Aotearoas leat measta 300 njealjehasgilomehtera eukalyptus- vuovdi nugo Austrálias,muhto Mella dadjá ahte koálaguovža borrá dušše muhtinlágan eukalyptus-muoraid, ja daid searvvis vállje maid dušše soames dihto muora ja dihto lastta.
– Lea leamaš hirbmat váttis sirdit koálaguovžžaid ođđa guovlluide Austrálias, šaddá áibbas sihkkarit roassun sirdit daid Aotearoai, lohká Mella.
Austrálias leat badjel 100 000 njealjehasgilomehtera eanan buollan dan rájes go meahccebuollimat leavvagohte čakčamánus diibmá. 26 olbmo leat duššan buollimiin, ja máŋga duhát ruovttu leat billahuvvan. Jáhku mielde leat badjel 1 miljárdda ealli jápmán buollimiid geažil.
- Loga eambbo: