1988 álggahii Skoglund Paltto iežas vuosttaš fitnodaga. Son galggai bargát dulkan ja jorgaleaddjin. Sámegiella lei su eallinláibi.
Áhči neavvagat
Skoglund Paltto ii lean soaittáhagas válljen eallingeainnu. Son diđii mánnán juo makkár eallinbálgá galggai guorastit.
Su áhččerohkki lei nevvon bártnis, dat ledje guokte ášši maid Jan galggai oahppát.
– Áhččerohki dajai ahte mun galgen bargát guokte ášši eallimis. Vuosttaš lei ovddidit sámegiela, dat lei dehálaš sámi servodahkii. Ja son háliidii ahte sámegiella galggai oažžut seammá árvvu go eará gielat ge.
– Nubbe ášši lei ahte mun galgen oahppát dánsut. Oainnat dánsuma bokte sáhtten deaivat ja oahpásnuvvat dehálaš olbmuiguin, miehta máilmmi. Ja nu in dárbbašan alkohola go galgen suohtastallat, muittaša Jan Skoglund Paltto dán vahkku «Studio Sámis».
Interneahtta lei balddonas
Jan lei álggahan iežas fitnodaga ovdalgo interneahtta joavddai norgga servodahkii.
Muhto eai gollan galle jagi ovdalgo interneahtta lei dehálaš bargoneavvu Jan Skoglund Palttoii.
– Muittán ovtta čállosa Aftenpostenis maŋŋel go interneahtta lei šaddan oassin min árgabeaivvis. Sii čálle ahte dál jávket buot smávit gielat máilmmis. Interneahtas eai ceavzze eambbo go dat gielat maid olles máilbmi hupma, nugo eŋgelasgiella.
– Mun skurtnjagin oalát. Mun jurddašin ahte de manai mu eallinláibi. Muhto maŋŋel go guokte vahkku ledjen skurdnján, de fuobmájin ahte dál mun baicca sáhtán olles máilbmái oahpahit sámegiela interneahta bokte. De mun gal movttáskin fas, reaškkiha Skoglund Paltto.
- Prográmma oidno maid NRK1 gaskavahkku diibmu 2315.