Moadda jage hæhttuji vuorddet åvddål gådijt bessi biggit

Valla soabmása li gatjádam suohkanis goadev tsieggit sierra årromsalljuj, mij ij la gárves. Li ájn nágin jage åvddål dajna saljujn garggi.

– Gatjálvisáv lip oadtjum náginis gut sihtá goadev tsieggitjit Hamnbakkan årromsaljon. Valla jus riekta jáhkáv de ij la gárves åvddål nágin jage dát rájes, javllá teknihkalasj jådediddje Divtasvuona suohkanin Pål Strøm Jensen.

Måttijt jagijt la gássjel læhkám Ájluovtan goadev tsieggit dan diehti gå ælla goahtesaje masi ulmutja lágedi. NRK dán birra tjálij jagen 2008. Dallusj suohkanoajvve Anders Sæter diededij jus nágin goadev sihtá tsieggit, de suohkan galggá vedjav, kloáhkav ja tjátjev gárvedit.

Párrabielitja Ingrid Kintel ja Alexander Mikkelsen, gudi dijmmá goahtesajev åhtsågådijga, imájdallaba manen suohkan árabut ij la dájt gássjelisvuodajt tjoavddám.

– Divtasvuona suohkan la dáv måttijt jagijt diehtám, ja li máhttám dáv dilev árabut tjoavddet. Valla sij ælla juojddáv dálátjij dahkam. Jur dat muv assjmat, javllá Ingrid Kintel.

Sihtaba sáme bájken årrot

Kintel subtsas såj Alexanderin libá sámegielajn bajássjaddam, ja Ájluovtan la ájnna bájkke vuonarijkan gånnå julevsámegiella gullu. Dan diehti sihtaba danna årrot.

– Ájluovtan giella viessu. Dánna gielav gullap oassásin, skåvlån ja mánájgárden. Mån jáhkáv jur dat mijáv gæssá boadátjit sijddaj, danen gå sihtap mánájt bajásgiesset sámegielajn.

Ådå regulerimpládna

Teknihkalasj jådediddje Pål Strøm Jensen diedet hæhttuji nágin jage vuorddet, sij gudi galggi Hamnbakkan årromsaljon goadev biggit.

– Jus riekta jáhkáv de hæhttuji ájn nágin jage vuorddet, dan diehti gå ådå regulerimplánav hæhttup dahkat. Biednigij diehti ájgge gållå. Valla akti ájgenis hæhttu ådå regulerimpládna dagáduvvat.

Párrabielitja æbá dáv lijkku, ja sávvaba suohkan jåhtelappojt dájna ássjijn barggá.

– Ij la buorre gå nav mælggadav hæhttujin vuorddet. Valla vuorddet hæhttujin dan diehti gå ælla ietjá goahtesaje gåsi sihtin goadev tsieggit, tjielggi Alexander Mikkelsen.

Ælla tjáppa goahtesaje

Teknihkalasj jådediddje diedet suohkanin juo li gárves goahtesaje, valla ij jáhke nágin dajt lágedi.

– Uddni li miján 6-7 goahtesaje Ájluovtan gånnå la tjabu væddja, kloáhkka ja tjáhtje ållu lahkusin. Valla gå ælla aktak dajt gatjádam, de iv jáhke nágin daj goahtesajijda sihti goadev tsieggit.

Dáv Alexander Mikkelsen duodastahttá

– Da goahtesaje ma juo li gárvvása li ilá smávuga. Gå goadev dasi lip tsieggim, de la juo ålles goahtesaddje anon.

Li ietjá máhttelisvuoda

Pål Strøm Jensen subtsas gávnnuji ietjá máhttelisvuoda jus galga goadev Ájluoktaj tsieggit.

– Suohkan la biednigijt juollodam viddnudahkaj mij la ådå årromsaljov dahkam Hamnhågenin. Danna la juo akta goahte tsieggiduvvam.

Viddnudahka NSB Nordsalten Boliger AS dáv duodastahttá.

– Miján li 4-5 gárves goahtesaje Hamnhågen årromsaljon, duodden máhttelisvuohta dahkat 30 ådå goahtesaje, subtsas jådediddje Bernt Langås.

Valla viddnudagá jådediddje subtsas e aktak gådijt jali goahtesajijt lágeda dan årromsaljon.

– Lip dåssju avtav årov vuobddám. Iesj hæhttujma avtav oasstet ja viddnudagá aksjonera guokta årojt oasstin. Ælla aktak goahtesajev gatjádam oasstet.

Sihtaba soapptsot

Ingrid ja Alexander, gudi goadetsieggimijn vuorddeba, æbá sidá dán salljuj goadev tsieggit.

– Goadev tsieggit la juoga majt dagá ålles viessomájge åvddålijguovlluj. Gå galga biggit goadev, de viertti usjudallat dån gávna sajev gånnå sjatta soaptsot. Gånnå la biejvve ja ij la biegga. Ja dá goahtesaje li industrija lahkusin, mån imájdaláv jus máná galggi industrija tjadá skåvlåj vádtset, gatját Kintel.

NRK la niellja párraguojmátjij ságastam . Divna párra li suohkanis goahtesajev gatjádam, ja vásstádusáv vuorddi.