Dav javllá Alessia Reina (18) guhti jådet bájkalasj politihkalasj rádev Bodø AUF. Reina berus ulljoåhtsåmav mij la Lufåhta, Viestarála ja Sáttjá merragátte ålggola.
Alessia Reina la aj goalmát lisstaájrasasses Barggijbelludagán Viestarmera válggabijrán Sámedikkeválggaj.
Reina murges gå iednebelludáhka(Barggijbelludahka) sihtá boadosguoradallamav jåhtuj biedjat.
– Barggijbelludagá sámepolitihkalasj konferánssa viertti subtsastit mij la mijá miella LoVeSe birra.
Ep máhte biejsstet
Præssadiedádusán tjállá ij la tjiegos ulljo galggá liehket gånnå le, ja jáhtiguodomdáfo ja gålledáfo mij guosská turismaæládussaj Nordlándan ep máhte biejsstet, ávkken ájggeráddjidum bárggosajijda.
Reina mielas la juo Vuonarijkka millijárdav gålådam, ja måttijt jagijt loaptám dán diehtoguoradallamij.
– Guoradallam vuoset dáfojn li sierralágásj árvvo, ja dáfo li rasje, ja gájka birásgáhttimdutke li dajna várrodam uljov åhtsåt dajn dáfojn.
– Guoradallam aj vuoset ulljobuvtadibme vaddá ienemusát 1500 barggosaje, madi dálla la 6500 barggosaje tjanádum guolástussaj ja turissmaj dåssju Lufåhtan. Muv mielas Lufåhtan, Viestarálan ja Sáttján la stuorra árvvo boahtteájge ådåsmahttem tjoavddusijda jus dal dajt gáttip.