Daelie produksjovnine aalkeme orre åarjelsaemien Tv-raajroe Sööfen bïjre. Jih daate TV- raajroe sjædta noeride gïeh lea gaskoeh uktsie jih luhkie göökte jaepien båeries.
– Luste dejnie barkedh, jih mijjieh guarkebe man vihkeles barkoe lea gieline barkedh. Mijjieh ovmessie produksjovnh dorjeme, mohte naaken produksjovnh lea vihkielåbpoe, jih daate produksjovne lea akte dejstie, dam jeahta Hallem.
Dah produksjovnem eelkin daan våhkoen barkedh. Produseente Bjørn Tore Hallem TMM Produksjovnesne soptseste ahte eah gåessie aerebi dagkeres produksjovnem dejtie båeriesommes noeride dorjeme jih dïhte tuhtjie vihkeles dejtie noeride aaj TV-raajroem faaledh.
Daate lea TV-raajroen sisvege
Sööfe Tråantesne årroeminie. Dïhte åtna saemien tjidtjie jih aehtjie laedtie. Gåetesne dah saemiengieliem soptsestieh, mohte Sööfe ij leah ussjedamme gustie dïhte båata. Gåessie dïhte lea guessine sov tjidtjien fuelhkien luvnie mearhkoeminie, dïhte damta daate lea ammes kultuvre, jih ij daejrieh guktie gosse nemhtie domtoe.
Gosse tjidtj-aajja sealede, dellie daajroes saemien tradisjovnh gaarvene. Sööfe råaka saemien voelpem jih dah guaktah vuelkiejægan gïeletjåanghkose jih Sööfe aaj vielie bovtsi bïjre lierie.
– Vihkeles mov maanide
Eejhtege Hilde Danielsen tuhtjie lea vaenie faaleldahkh åarjelsaemien maanide, dannasinie lea vihkeles dovne vuejnedh jih govledh dam åarjelsaemien gïelem gosse nuepie båata.
– Daate nænnoste mov maanide garmeres åarjelsaemine årrodh. Jih vuesehte mijjen kultuvre mïrrestalla daaroen kultuvrine.
Dïhte jeahta maanah buerebe goerkesedtieh, gosse åadtjoeh saemien kultuvrine åahpenidh.
– Mov maanah aavoedieh åadtjodh TV-raajroem vuejnedh.