Gárasávvunviesát Marja-Meele Päiviö (16) la nuppát jáhkásasj oahppe Jielleváre sabekjoarkkaskåvlån.
Dán vahkkoloabe lij «Gällivarepremiären» Jielleváren, Svierigin. Lávvodagá lij fristils sprintta gånnå Päiviö gæhttjalij makta nagáj gilfádit, giese ja tjavtja hárjjidallama maŋŋela.
– Dat lij suohtas, valla ij mannam nav buoret, valla dat boahtá. Dat lij dåssju vuostasj gilffe, ja mån iv la háhppidam tjuojggat ienebuv gå biel nuppe vahkov.
Tjuojgge Marja-Meele Päiviö li vuorddemusá dálvváj jusga dal astmajn la vájvasutvvam.
Foto: Stefan Karlsson/Sameradion & SVT SápmiPäiviö ij lim rat dudálasj ietjas tjuojggamin, ja nagáj dåssju neljadisfinállaj. Doajvvu dal buorep manná dálvváj, gå dal ájgge dåbbán.
Lågå:
– Dá dálvváj mån ájádaláv at iv galga liehket nav garras ietjam vuosstáj, nav vaj galgav ienep dudálasj liehket ietjamijn. Danen gå lav nav at iv rat duostá javllat gå manná buoragit. Mån doajvov gåjt máhtáv dahkat muv buoremusáv dán dálve.
Päiviö la dudálasj ietjas hárjjidallamijn majt la giesev ja tjavtjav tjádájdam jus ga l vájvástuvvam låsså vuojŋŋamijn.
Vihtta tjuojgge juohkka neljadisfinálan ráhtjin Hellnerstadionan Duoddarin Jielleváren.
Foto: Naima Khan Nergård / NRK– Dat la riek buoragit mannam. Valla mån lav vájvastuvvam låsså vuojŋŋamin. Ja mån iv la diehtám mij lij vihken. Valla dálla de diedáv at la astma.
– Mån lav læhkám Muonion tjuojggamin moadda biejve åvdep vahko, ja sæmmi låssåt lij vuojŋŋat. Sávav dálvváj luojttá, nav vaj buorre láhkáj máhtáv vuojŋŋat ja tjuojggat nav jåhtelit gå vejulasj, hæjttá Marja-Meele Päiviö.
