- Ásšiiguin lea mihá geahppasat meannudit go áirras lea doppe.
Boazodoallu beassá de árrat lea mielde go áššit galget hábmejuvvot, dalle go Finnmárkku Opmodaga stivra (Fefo) mainna nu álggeš.
Go makkár ge ođđa áigumušat čuožžiležžet Finnmárkku eatnamiidda, de lea Fefo stivrra bokte mis vejolašvuohta hehttet vahágahttimis boazodoalu, lohká Sara.
Eanadoallu stivrras
– Finnmárkku Boanddaid Searvi oaidná maid ovdamuniid ortnegis ja hálidivčče Fefo stivrii iežas ovddasteaddji, lohká searvvi jođiheaddji Fred Johnsen.
Fefo stivra ii livčče gieskat cakkadišgoahtán boanddaid eanaoastinvejolašvuođa, jus mis livčče leamaš áirras stivrras. Dalle livčče mis leamaš doppe gelbbbolašvuohta eanadoalu bealis mii livčče hehtten diekkár áššemeannudeami, lohká Johnsen, gii orru Juovlavuonas.
Ii leat riekta
Fefo stivrrajođiheaddji Erling Fløtten lea vuostá addimis saji eanadollui, go dat sáhttá eará ealáhusaid movttidahttigoahtit viggat stivrii.
- Ealáhusa bealis šattašeimmet dalle dakkár gilvui gos buot ealáhusat leat vuostálagaid, mii gal ii soabašii Fefo mihtuiguin, lohká Fløtten.
- Boazodoalu eret
Filkkagieldda eanadoalločoahkkimis galgá Fløtten leat lohkán ahte boanddat, dan sadjái go viggat stivrii, galggašedje baicce eret oččodišgoahtit dan boazodoalloáirasa mii otne lea stivrras.