Divtasvuona, Hábmera ja Stájgo suohkanoajve (STH-nammadus) aktan Sámedikkerádijn tjåhkanin vásse bierjjedagá gånnå ságastallam lij varresvuodafálaldagá julevsáme guovlon hiebadahtedum sámij dárboj gáktuj.
STH-nammadusá jådediddje Tor Asgeir Johansen subtsas tjåhkanimen guorrasin vas ådåsis barggagoahtet guovllomedisijnalasj guovdásjássjijn.
– Valla dán bále dá gålmmå suohkana aktan, aktan sámedikkerádijn ja sáme ájrrasij bájkálattjat.
Ietjá hámen
Juska barggo vat álgaduvvá, de sjaddá ietjá hámen.
– Tjoahkkip bargov mij la juo dagádum, ja soajttá ådå álgov dassta dahkap STH-nammadusá baktu, subtsas Tor Asgeir Johansen.
Valla vuostak vierttiji dá gålmmå suohkanij suohkanstivra dåhkkidit dán bargguj sæbrrat.
Sámedikkerádeájras Henrik Olsen le tjåhkanimijn viehka dudálasj.
– Mij lip STH-nammadusájn ådå vuodov dahkam gånnå sámij varresvuodagatjálvisáj barggap, aktan DMS-ássjijn.
– Badjelgæhttjam bájkálasj sáme jienav
Valla akta gut ij lim dudálasj bargujn lij suohkanpolitihkkár Divtasvuonan Filip Mikkelsen.
Sån ij lim gåhtjoduvvam tjåhkanibmáj, valla tjåhkanime gietjen sån bágov doappij ja garrasit tjåhkanimev lájtij, mij suv mielas lij badjelgæhttjam bájkálasj sáme jienav.
– Ij la åvvånis akta sáme jiedna bievde nuppe bielen. Gånnå la sábme? Ållu hådjånav.
NRK:aj sån javllá sån diedij sån dánna dagáj juoga tjåhkanimnjuolgadusáj vuosstij, valla sån dav dagáj gå sån sidáj tsuojggit ja diededit ij dåhkki sámij åjvij badjel ságastit gå dievnastusá sámijda la ássjen.
– Sidáv dættodit dav gå avtaárvvusasjvuoda, histåvrå ja boahtteájge fálaldagá birra le sáhka sáme álmmugij hárráj, de la ájnas sáme jiedna gullu dakkir tjåhkanimij.
– Sáme galggi sæbrrat
Tor Asgeir Johansen ij sidá dasi mij dáhpáduváj majdik moalgedit, valla sámedikkeráde Henrik Olsen javllá ássje birra viertti ságastaláduvvat moatten dásen.
Dán bále lidjin suohkanráde ja sámedikkeráde gudi ássjev giehtadallin. Sáme jiena galggi sadjáj boahtet ja sån jáhttá sij galggi gullut.
– Dán bále ássje suohkanåjvij aktan Sámedikkeráde gasskan dágástaláduváj. Dát ássje galggá ságastaláduvvat duon dán dásen. Sáme jiena galggi gullut, dav lip guorrasam suokanij aktan.
Guláv KUN (senter for kunnskap og likestilling) galggá sæbrrat fágalasj resurssan. Manen ij la Árran - julevsáme guovdásj fágalasj viehkken prosjæktaj gåhtjoduvvam?
– Iv Árranav jali ietjá sáme organisasjåvnåjt ålgoda, soajttá máhtti ássjen oassálasstet. STH-nammadus lij KUNav gåhttjum giehtotjit avtaárvvusasjvuoda birra, dan diehti gå siján le ållo diehto dan birra, vásstet STH-nammadusá jådediddje Tor Asgeir Johansen.