Rasmus Utsi ii áigun diktit tuiskalaččaid evakueret su báhtarii várrái, ja das maŋŋá son čorgii miinnaid Norgga suodjalusa ovddas. Dál son gudnejáhttui veahki ovddas.
Maŋŋá dán dáhpáhusa Bissojogas soai rasttildeigga duoddara gitta go olliiga Ruostefielbmái Deanus. Dasto soai manaiga Čáhcesullui gos oaččuiga soahtebiktasiid ja álggiiga čorget miinnaid.
Soahtehistorjját leat su mánnávuođa máidnasat
Rasmusa nieida Biret Elle Utsii leat áhčči muitalusat šaddan duohttan.
Foto: Arne Ivar Johnsen / Nrk
Rasmus ja su eamida Anna nieida, Biret Elle Utsi, muitala ahte soahtehistorjját leat su mánnávuođa máidnasat. Go áhčči muitalii iežas soahtevásáhusaid birra de mánát čohkkájedje dego gintalat ja guldaledje dárkilit maid muitalii.
– Dál go áhčči lea ožžon medállja de šaddet dát máidnasat duohtan, lohká Biret Elle.
Girječálli Roger Albrigtsen lea čállán girjji «Krigens vitner – Finnmark-skjebner 1940-1945» ja dan bokte lea Rasmus Utsi ožžon medálja su veahkkáivuođa ovddas mannan máilmmisoađis. Rasmus lei maid mielde veahkeheamen soahtefáŋggaid geat ledje duiskalaččaid hálddus Kárášjogas.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.
