PÅ NORSK:
(Muitaleaddji: Siri Inga Holm)
Áhčči diđii eatnanealu dieppe Dilljavárbealde. Na, de ovtta čáppa eahket geasset dalle moai vázzileimme dohko. Oainnat dohko lei luodda dohko dieđus, moai vácciime dan luoddarái`. Gohčodedje Dilljavárrin dan vári, dat lea mealgat vázzit.
Na, moai vácciime áhčiin dohko. Áhčči diđii áhkkorat (justte) gokko lei. Ja áhčis lei dakkár máhcastatgoaivu, dološ duiska goaivu, dat lei fárus. Ja dat goaivvui, goaivvui várra mehterbeali. Dat skolkkii dušše, ii das boahtán mihkke.
Na, ii das maide, moai vázzileimme vulos, dohko Kárášjot guvlui, márkanguvlui, ja niejaime dan vári bodnái. Ja lei okta uhca ádjagaš, moai gáfestalaime das. Gearggaime gáfestallamin, ja de vázzileimme márkana guvlui.
Geahčastetne maŋás, uhca rukses miesáš munno maŋis boahtá! Na, ii das maidege, ii áhčči maidege das, ja de dat jávkkai. Bođiime márkanii, bođiime ovtta áhku, Juhaš-Ánne geahčái. Dat lei sáimmaid oahppamen, heaŋgume, dat lei fitnan, na diesa suhppon johkii, Kárášjot-gáddái sáimmaid.
Na, oruime das ija, manaime buvdii, Beargga buvdii. Ja áhčči dat dieđus muitala mo dat dal sudnos lea geavvan; moai letne uhca miesáža oaidnán, ja maid moai leimme doppe. Na lohká, heh, it bálkes oalggi ala? Áhčči vissa ii bálkestan maidege oalggi ala. Doppe lea leamaš dat riggodat, dien miesi duohken lei dat riggodat. Dat lei, in dieđe mo lei, muhto miessi, diet lei okto, eai bohccot gal oidnon. Ja, die lean mun ovtta rukses miesi oaidnán iežan eallinagis, in ge leat šat goassege oaidnán uhca rukses miesáža. Dat čiegát leat ain doppe!