Stuorámus bellodagaid áirasat dávjjimusat eret politihkalaš čoahkkimiin
Diibmá 2022 masse 14 iešguđet bellodaga politihkkára oktiibuot 162 000 ruvnnu doarjagiid go ledje eret politihkkálaš čoahkkimiin. Sámedikki stuorámus bellodagaid, Norgga Sámiid Riikkasearvvi ja Nordkalottfolketa, áirasat ledje dávjjimusat eret čoahkkimiin.
Nordkalottfolketis leat ovcci áirasa ja diibmá ledje oktiibuot 69,5 beaivvi eret čoahkkimiin. Dávjjimusat lei eret bellodaga parlamentaralaš jođiheaddji Torill Bakken Kåven, son lei eret badjel beali čoahkkimiin. Dát leat jávkamat maidda áirasat leat ohcan lobi.
–Olbmuin leat maiddái eará beaivválaš geatnegasvuođat sihke barggu ja priváhta eallimis. Dat dagahit ahte eai boađe čoahkkimiidda, dadjá bellodaga nubbi jođiheaddji Ulf Tore Johansen.
Norgga Sámiid Riikkasearvi boahtá nubbin, 16:in proseanttain. NSR áirasiin Sandra Marja West lei 20.5 beaivve eret. Son lea leamašan Riddu Riđu festivála jođiheaddjin 2022 geassemánu rádjai. –Festiválabarggu geažil son lei dávjá eret. Muhtimin lei veadjemeahttun ovttastahttit politihka ja barggu, dadjá West.
Nordkalottfolket Sylvi Pedersen Vatne lei dávjjit eret čoahkkimiin go oassálasttii daidda. Su jávkan lei diibmá 70 proseantta.
Sámedikki čoahkkimiin lea vejolaš leat eret vihtta beaivvi, jos dávjjit lea eret de unnu doarjja. Diibmá ledje Sámedikkis 32 lávdegotte- ja dievasčoahkkinbeaivvi.