Advokáhta : – Sápmelaččat šaddamin sivvaguoddin
–Ii leat badjeolbmuid ášši jos elrávdnji divru Gaksa-Trøndelagas. Oljo- ja energiijadeoartemeanta dat 2013:s attii lobi bieggafápmorusttegiid hukset vaikko sápmelaččaid vuoigatvuođat eai lean albma láhkai čielggaduvvon, dadjá Constance Jessen Holm, Advokáhtalihtu olmmošvuoigatvuođalávdegotti advokáhta.
Dan son cealká go Fovsen-sápmelaččat dovdet, ahte Norgga stáhta lea váikkuhan dasa, ahte sápmelaččat leat šaddamin sivalažžan jos Trøndelágas divru elrávdnji.
Stáhta lea mieđihan, ahte Fovsenis dáhpáhuvvá olmmošvuoigatvuođa rihkkun ja lea átnon ándagassii Fovsen-sápmelaččain. Advokáhta Constance Jessen cuiggoda goittot vuogi mo stáhta lea meannudan Fovsen-ášši.
-Stáhta Fovsen-ášši meannudeapmi lea dagahan ahte sámi álbmot dat sivahallojuvvo dan geažil go lea leamaš viehka váttis dovddastit ahte dás lea sáhka olmmošvuoigatvuođaid rihkkumis, dadjá Jessen Holm.
Bieggaturbiinnaid huksen čuohcá Fovsen-Njaarke sijte boazosámiide geat gullet goabbatge orohahkii, lulit ja davit orohahkii.
–Politihkkárat fertešedje vihkkedallat dárkilit sániideaset vai ii šatta vaššisáhkan, sihke sii geat leat bieggaturbiinnaid beale ja sii geat daid vuosttaldit, dadjá mátta-Fovsena sijte jođiheaddji Leif Arne Jåma.
Jessen Holm jáhkká ahte lea maid vejolaš, ahte sápmelaččat váibet čuollat vuoigatvuođaideaset beale.
–Son ádde bures jos sápmelaččat leat dolkan dáistaleamis vuoigatvuođaideaset beale, eai nagot šat ja vuollánit njulgestaga dan geažil go dát šaddá menddo lossadin, vaikko dat ii leatge riekta, dadjá Jessen Holm.
Oljo- ja energiijadepartemeanta ii hálit vástidit leago stáhta vai sápmelaččat geat galget guoddit sivalašvuođa jos elrávdnji divru Gaska-Trøndelagas.
Departemeanttas eai vástit dasage ahte leatgo sii sivalaččat dasa, go sápmelaččaid dál leat dagahan gáržžohallan dillái. Šleađgapoastta bokte vástida oljo- ja energiijaministtar Terje Aasland ahte stáhta ovddasvástádus lea gávdnat čovdosa mii ii rihko olmmošvuoigatvuođaid.
–Sutnje lea dehálaš gávdnat čovdosa Fovsen-áššis mii duddjo luohttámuša ja gudnejahttá badjeolbmuid ja dan dehálaš máhttu mii sis lea, čállá Aasland.
