Loddevirus leavvá Lulli-Norggas
Ovtta vahkkus leat gávdnan badjelaš 60 jápmán lotti Lulli-Norggas, virus buozalmasa geažil.
– Newcastle-gohčoduvvon buozalmas lea hui várálaš, ja dagaha ahte lottit jápmet, muitala Biebmogeahčču ossodathoavda Telemarkas Asle Fremgård.
Dál barget Rogaland, Innlandet ja Østlandet fylkkain eastadit sihke loddeinflueansa ja Newcastle-buozalmasa leavvamis. Lea unnán várra ahte dávda njoammu olbmuide.
Bárbmolottit leat buktán dan dávdda Norgii, ja dan ii leat beare bissehit, muitalit Biebmogeahčus.
– Lea váttis diehtit man ollu dát dávda lea leavvan luonddus, muitala Fremgård.
Vearrámus livčče jus dávda njoammu návetdollui, čilgejit Biebmogeahčus.
Jus fuobmájit dávdda ovdamearkka dihte vuoncáin, de fertešii buot vuoncáid dan návetdoalus goddit.
Dat šattašii erenoamáš divrras boanddaide, muhto maiddái sidjiide geat borret moniid ja vuoncáid, čilge Fremgård:
– Jus dát dávda bisána deike ja bistá guhka, dat dagašii ahte hattit gorgŋot.