Dovddut musihkkahámis
Duo Maret, dahje Marit Hætta Øverli ja Klemet Anders Buljo, eaba leat čohkkán jaska dáid maŋimuš áiggiid.
Preassadieđáhusas muitaluvvo ahte leaba leamaš ávdin barttas bargamin musihkain. Dás galgá boahtit olles skearru čakčat.
Muhto dassážii beassat návddašit «Gula mu», mii lea aiddo almmuhuvvon.
– Šuokŋa lea sidjiide, geat leat manahan iežaset vuogi dovdduid čájehit. Sidjiide, geat leat manahan iežaset giela dahje ožžo dieđu ahte ii lean lohpi juoigat, čálliba preassadieđáhusas.
Šuokŋa lea ožžon buriid árvosániid, ja dat ii soaitte leat nu ártet. Dás lávlojuvvo dovdduid birra, ja gaskkustit dovdduid, dan dat gal Marit Hætta Øverli čehpet dahká jienainis.
Don gulat ođđaseamos sámi musihka New Music Sápmi listtus Spotifys.