FeFo ii dovdda ON-raportta sisdoalu
Ovttastuvvon Našuvnnaid erenoamášraportevra, Victoria Tauli-Corpuz, fuomášuhttá raporttastis Finnmárkkuopmodaga, FeFo, duppal-rolla. FeFo lea moitojuvvon go juo FeFo lea sihke eanahálddašeaddji - ja seammás vel kommersiealla ruhta-tinejeaddji. ON-raportevra cealká ahte mo FeFo hálddaša dán duppalrolla, lea erenoamáš dehálaš FeFo vuoiggalašvuhtii. FeFo gulahallanjođiheaddji Eirik Palm čállá NRK:i ahte FeFo čuovvu Finnmárkolága - iige hálit kommenteret dađi eambbo. ON:a raporta almmuhuvvui borgemánus, muhto liikkáge čuoččuha Eirik Palm ahte FeFo bealis eai oppa dovdda ge ON-raportta sisdoalu.