Maret Anne Sara (24) gohčoduvvo kreatiivvalaš geavaheaddjiservodaga dáiddárin, gii ii bala geahččaleames ođđa vugiid dáidagistis. Ieš váillaha dát nuorra dáiddár eanet ealas ođđaáigásaš sámi dáidaga, ja oaivvilda ahte sámi dáidda ja sámi girjjálašvuohta leaba sullii seammalágan dilis dán áigge.
Goalmmát sierračájáhus
Dá ii leat Maret Anne Sara vuosttaš sierračájáhus. Sus leat juo leamaš moadde čájáhusa iešguđet guovllus Sámis, earret eará leat sus leamaš guokte sierračájáhusa diibmá. Nubbi lei Anáris ja nubbi ges Guovdageainnus. Lassin lea son leamaš oassin joavkočájáhusain Tromssas, Riddu Riđđus ja Guovdageainnus.
Mále fielluide ja horstii
Maret Anne Sara váldá atnui feara maid go njuohtá ja mále. Váldá ođđa ávdnasiid ja dasa seaguha dološ sámi árbevirolaš osiid. Dat lea stoagus dainna ahte dálá árgabeaivi galggašii joksat nu ollu, seammás go galggašii doalahit dan mii lea árbevirolaš. Danne Maret Anne Sara sáhttá málet nu go horstaseahkaide dahje fielluide máid gávdná iežas lagasbirrasis.
Dáidda lea sutnje gaskaoapmin govvidit jurdagiid ja dovdduid. Ja su mielas ii leat dáidda dakkar mii álo galgá leat nu duođalaš, muhto dáidaga dihte maid galggašii sáhttit reaškkehit.
Sara lea sullii jagi bargan juste dáinna čájáhusain, ja lohká veahá váivin ahte dáiddalaš bargu ii leat su ollesáigge bargu.
