NRK Meny
Normal

- Riššaluoitin fuolastuhttá

- Son lea fuolastuvvan Nikkela riššaluoitimiin, lohká Sámeráđi njunuš Pauliina Feodoroff.

Pauliina Feodoroff

Mihtideamit duođaštit ahte Nikkel gávpogii Ruošša bealde, lea luiton áibmui hui ollu rišša dan maŋimuš vahku.

- Jus sullásaš riššaárvu deaividit Norggas, de livččiimet áigá fárrehan álbmoga eret, lohká Norgga Áibmodutkanlágádusa dutkti, Lars Robert Hole.

  GULDAL: Ollu rišša áimmus

-Vearrámus luonddurihkus

Sámerádi ságadoalli Pauliina Feodoroffa mielas leat Nikkela nuoskkideamit eahpitkeahtta davviriikkaid vearrámus luonddurihkus.

Røyk fra Nikelverket
Foto: Arne Store / NRK

- Danin lea davviriikkaid njunnožiin, muhto maiddái sámi njunnožiin, geatnegasvuohta fuomášuhttit dili.

Fitnodagat galggašedje áddet ahte sisge lea ovddasvástádus birrasiidda ja servodagaide gos doibmet, lohká Feodoroff.

Čuohcan nuortalaččaide

Nuortalaččat golmma riikkas, geaidda Feodoroff ge gullá, leat gillán Nikkela riššanuoskkidemiin máŋgalot jagi,

Láhppu ii šatta šat lagaš vuvddiin, muhtun jávrriin leat guolit jávkan. Boaittobeal báikki olbmuide lea dás stuorra váikkuhus.

Muhtun beivviid sáhttá vel smáhket ge rišša gitta Čeavetjávrris Suoma bealde, mii lea máŋga miilla eret ruvkkis.

20 gearddi badjil lobálaš meari

Norgga Áibmodutkanlágádusa seniordutki Lars Robert Hole muitala mannan vahku mihttideamiid čájehit 7500 mikrogramma rišša kubihkamehteris. Hivvodat lea 20 geardde eanet go mii Norggas lea lobálaš rádjá.

- Sullásaš árvvuid eai leat mihtidan Nikkelisge goit 15 jahkái. Norggas gal livčče diekkáraš dilis áigá jo fárrehan olbmuid, lohká Hole.

Rišša lea váralaš dearvvasvuhtii

Rišša šaddá go málmmas earuhit nikkela. Rišša lea váralaš dearvvašvuhtii ja sáhttá dagahit borasdávdda.

Dilli lea gal buorránan 90-logu rájes, go Ruošša beali Nikkela ruvkái huksejedje dalle ođđa buhtistanrusttegiid.

Sámeráđi ságadoalli Pauliina Feodoroff mieđiha, ahte eai leat maŋimuš áiggiid čuvvon nu sakka Nikkela riššadili.

- Muhto ođđa dieđut goittotge fuolastuhttet mu, lohka son.

-Unnán dutkan váikkuhusaid

Guovllus leat plánat lasihit málbmabuvttadeami sihke Ruošša ja Suoma bealde rájá.

- Mu dieđu mielde ii leat oktage albmaláhkai dutkan mo nie stuorra nuoskkideamit váikkuhit guhkit áigái lundui ja olbmuid dearvvašvuhtii, lohká Feodoroff.

Sihke eaiggádat ja ruošša guovloeiseválddit leat bidjan biekka sivvan go nu ollu lea rišša gávpogis. Nikkelrusttega eaiggádiid mielas lea dilli normála, ja sin mielas leat Norgga mediat mearehuddamin dáinna áššiin.